Come on！雞翼控「一齊叫雞」喇！呢間人氣雞翼專門店終於喺九龍區開分店喇，選址交通便利嘅旺角，新店開張除咗有限定新口味之外，仲乘勢推出90分鐘雞翼放題，最多可以有成18種口味選擇！

呢度嘅雞翼，都係用獨家配方嘅醬料醃製，真空、慢煮處理完後，收到落單再即叫即炸，所以脆口得嚟又保留到內裡嘅肉汁。平時見到佢哋嘅menu，款款味都好吸引好想試，今次呢個放題終於有機會逐隻試喇！90分鐘嘅放題，除咗星期三之外，日日都有，不過唔同時段就唔同價錢，最平$128就可以食到(立即按此訂座享優惠)。

必須要介紹嘅係旺角店新出限定口味——花雕醉雞，師傅用上花雕酒、玫瑰露等幾款酒去製作，難怪離遠已經聞到陣陣酒香。仲有少少花椒喺面，醉香得嚟仲有微微辣感，層次豐富。

另外17款味道中，最特別嘅就係雞翼雞煲啦，混合咗香港人最鍾意嘅元素，有gimmick得嚟啲醬汁又麻又香，愈食會愈想食。

食得辛辣嘅朋友仔，Wingman水牛城醬味都幾推介，呢個係自家調配嘅水牛城醬，加埋芝士喺面，仲有啲辣椒，係幾惹味。但如果講到挑機，就梗係揀打大佬——死神醬味啦。傳說中嘅特級辣指天椒，掂一掂到啲醬已經衝出辣勁，莫講話食晒成隻，絕對刺激。

  印度唐杜里烤雞味、日本蜂蜜芥辣、死神醬、日本吉列咖哩味、加勒比海香辣雞

 巴馬臣芝士蒜蓉味、泰式甜辣醬、田園風味、黑芝麻海鮮蜂蜜、Espresso、水牛城醬

唔食得辣嘅都仲有好多選擇，田園風味係sour cream同洋蔥，完全係薯片味嚟，哈哈，同隻雞翼唔算話十分之夾但係呢個experience係幾有趣。如果唔小心食咗啲辣嘅雞翼，黑椒檸檬、黑芝麻海鮮蜂蜜嘅酸或甜都可以中和返呢。

 黑椒檸檬、新加坡辣蟹味、紐奧良香粉、自家製鹹蛋黃、蒙古燒烤味、Wingman水牛城醬

其餘口味仲有新加坡辣蟹味、紐奧良香粉、自家製鹹蛋黃、蒙古燒烤味、巴馬臣芝士蒜蓉味、泰式甜辣醬、咖啡香味、水牛城醬、印度唐杜里烤雞味、日本吉列咖哩味同埋加勒比海香辣雞，各有特色。

呢度唔係淨得雞翼嘅，另外都仲有啲小食同意大利飯，其中南瓜燴意大利飯就係旺角新店嘅新品，得呢間店先食到，以南瓜盛住creamy香口嘅意大利飯，食完飯仲可以嗶埋啲南瓜肉食添。

Wingman 
地址：旺角彌敦道594-596號旺角新城17樓

文：Kar
相、片：Tom Li