將軍澳日出康城首個大型超市終於開幕喇！呢個集本地集鮮活市場 + 現代超市於一身嘅全新生活概念店「FRESH 新鮮生活」佔地2萬呎，設有26個特色主題專區，包括本地及環球海鮮、新鮮蔬果、本地新鮮豬肉、急凍食品外，更引進米 坊、豆品專區、蛋專區、特色香料、藥膳及酒坊，最特別係仲有首創超市版 Omakase、即場海鮮加工服務、即製燒味同本地鮮製午餐肉及香腸～
寿司ほんぽ
全港首創超市版Omakase (廚師發辦)，以超值價錢買到多款每日直送新鮮刺身、壽司及料理。Omakase分$588及$388兩個價錢，揀好後師傅會即席製作後包裝好畀食客，兩set都有大拖羅、金目鯛同深海池魚等貴價刺身，加上日式小食，迷你丼飯及甜品，又幾抵食。
煮場館
場內嘅海鮮城供應多款新鮮海鮮，阿拉斯加大蟹、龍蝦及花甲等。懶蟲唔想自己煮，最正係有埋即場海鮮加工服務，而且煮法多達十幾款，鍾意清蒸、豉椒炒、金沙炒、芝士焗、油爆定蒜蓉粉絲蒸都無問題。
食點
平時食午餐肉都係罐頭貨，呢間提供本地鮮製午餐肉及香腸，所有午餐肉同香腸都用特定機器即製而成，新鮮又健康啲。另外仲有 即叫即製嘅特色熱狗，包括原條鰻魚滑蛋熱狗及熱溶芝士火辣熱狗等。
燒鵝皇子
由製作燒味多年嘅專業大師傅現場即製，主打皮脆兼肉汁香濃嘅「皇子燒鵝」及「嫲嫲豉油雞」，有一部特大嘅燒鵝風乾機製成脆皮燒鵝。叉燒亦賣梅頭肉，肉質軟腍。
日日糧坊
引入日本進口磨米機，挑選米種後可即場享用碾磨服務，根據個人口味碾磨成不同精米度，更供應老字號陳明記粉麵。
Snack & Treat
提供多款零食任君選擇，更有細路最愛嘅夾糖專區，大人都可以重拾以前夾糖回憶～
除咗特色主題專區，FRESH 新鮮生活仲有來自世界各地嘅新鮮水果同埋來自日本嘅靚牛肉，而且FRESH 非常重視本地生產，積極支持本地農業及香港製造創意品牌，當中包括小本經營企業、提倡公平貿易產品的社企品牌等，引入接近 1500 種香港製造產品，種類包羅萬有，例如麵食、特色醬料、果醬、傳統零食及糖果、蜂蜜、雪糕、 飲品等等，應有盡有！
地址: 將軍澳康城路1號The LOHAS 2樓201-201A號舖
文: Yanica
相、片: Calvin Kwok