牛魔王準備好個胃未？尖沙咀又有一間日式燒肉店開業，係筲箕灣區內出名抵食嘅人氣燒肉店激安燒肉工房嘅分店！新店地方更闊落，佔地4000呎，日式風味濃厚。雖然開喺租貴嘅尖沙咀，但餐廳一樣主打高質又抵食，有多款日本和牛、雞肉、豚肉、海鮮、定食、甜品及特飲，最正係新張午市有全單7折及生啤買一送一優惠呀～抵上加抵！

九宮格燒牛盛合($288)

一次過想試晒多款唔同特質嘅牛肉，就一定要試吓九宮格燒牛盛合，九格分別係牛小排、辣漬翼板肉、一口牛梅花、牛小排、A4和牛三角、牛護心肉、肉眼、厚切牛舌及果漬牛肋條，特別大推A4和牛三角油花豐富，牛護心肉肉味香濃，辣漬翼板肉就香濃惹味。

日本A4和牛西冷($248)

A4和牛西冷油花紋理均勻，肉質柔嫩，入口即溶又鮮嫩多汁，經燒烤後，一入口牛脂香於口中爆發。

頂級肉眼壽喜燒($116)

鍾意食壽喜燒嘅朋友不可錯過！選用Prime Grade肉眼，肉眼油脂分佈均勻，色澤透紅，輕輕一燒後捲起，點上加咗黑松露、蛋黃嘅壽喜燒醬汁，味道香甜帶黑松露香！

激巨薄燒牛舌($68)、厚切牛舌芯($78)

超抵食嘅牛舌！薄燒牛舌大大碟都只係$68，足足有半條牛舌咁多，將牛舌燒至微焦後口感香脆，而厚切牛舌芯有成吋厚，外脆內軟！

雞腿肉自信漬($42)、果漬牛肋肉($88)

店家嘅得意之作！主要使用紫蘇葉及多種香料醬汁去醃製，惹味帶陣陣香料味道。口味偏甜嘅朋友，果漬牛肋肉就啱你喇～牛肋肉用水果醃製，甜味自然，牛肋肉肉質亦軟腍。

一夜干喜之次($98)

全條一夜干喜之次都只係$98！喜之次魚油充足又嫩滑，魚味都好濃吓，記得燒熟一面先好反轉，唔係就會痴住個網架喇～

海鮮船($288/6款)

至於海鮮控，呢度選用魚市場新鮮海鮮，如元貝、蟶子，象拔蚌，車海老虎蝦，日本廣島蠔及鮑魚等，款款都新鮮彈牙又鮮甜。

驚安燒肉商店

地址: 尖沙咀金馬倫道48號中國保險大廈3樓C號舖

文: Yanica

相、片: Tom Li