近日疫情嚴峻，政府宣佈全港所有餐廳，一連七日嘅晚巿都要暫停堂食，好多餐廳都紛紛轉做外賣生意。叉飯、炒粉麵、或pizza、炸雞等就不在話下啦，估唔到連自助餐都有得外賣？！

位於北角嘅呢間酒店，最新推出「外賣自助餐」。每份自助餐都會配一份廚師精選沙律、一個是日甜品，同埋一個外賣盒。每晚6-9點，客人量過體溫同消毒雙手後，都可以拎住個外賣盒，按住自己嘅喜好，喺熱食區內好似平時自助餐咁，任夾想食嘅嘢食落盒度，砌靚啲，裝滿佢，再拎返屋企安全地慢慢食。

熱食區嘅選擇，同平時提供嘅一樣，有各款即切肉扒類、中、西、印式菜餚、燒烤等，師傅亦有細心考慮過，大部分嘅菜式都係冇乜汁嘅，大家唔使怕會漏汁，又唔使怕啲味會溝埋晒一齊啊。加錢嘅話仲可以有半隻龍蝦。

另外，今年好多人都興玩staycation，如果咁啱呢啲時間，會入住呢間酒店嘅話，都依然有機會享用到佢哋嘅「自助餐」！每晚6-9點期間都可以無限次拎嘢食，不過就係揀好晒嘢食之後，自己拎返上房食。

美食種類比外賣嘅多，包括冷凍海鮮、壽司刺身、凍盤、甜品、飲品、生果都有，而且仲會預先包裝好，成盒成盒咁拎走就得，既方便又衛生。

The Farmhouse
地址：北角北角邨里1號香港維港凱悅尚萃酒店西座2樓
外賣自助餐  每位$188
房內用餐 每位$420

文：Kar
相：酒店Facebook