最近疫情雖然有緩和跡象，但依然要食得健康增強身體抵抗力㗎！之前開飯仔就有介紹過一啲素食餐廳同有營餐廳，今次就推介幾間健康低糖嘅甜品、糖水店及飲品店畀大家，等各位於「疫」市中都能夠感受到一點甜嘛～
純素雞蛋仔 LN COFFEE
一間想將幸福同快樂帶畀客人嘅素食café ，店內供應唔少素食甜品，全部無蛋無奶無五辛。必食嘅有呢個喺出面較少見嘅素食雞蛋仔幸福彈彈仔，有原味、朱古力或抺茶味，主要用豆奶、醋、麵粉製成，比起平時食嘅自然就無咁heavy啦。
圖: 稀少糖代替普通糖 半糖主義
店如其名，以健康理念製作甜品。店內甜品都係用60-70%比例嘅糖去製作，而且選用稀少糖代替普通糖，熱量較低所以就算糖尿病人都啱食！紫薯窩夫、豆乳拿破崙、伯爵茶燉蛋同桃膠蓮子燉奶都係招牌甜品。
圖: 慢磨果汁店 Cling Juicery
唔好以為飲果汁一定健康，好多時候樽裝果汁都隨著時間及運送過程流失營養。觀塘呢間果汁店就主打慢磨果汁，用慢磨機將水果壓榨成果汁，當中可以拎到更多營養同水果中嘅成份，營養豐富外果汁味道都更好。牛油果奶昔、神石榴蘋果金奇異果汁都係人氣之選。
圖: 低脂Gelato Gelato go
美國過江龍Gelato店，每天使用新鮮材料製造，而且乳脂肪含量更加係低過8%，食完罪惡感都無咁重。招牌口味Gelato-go，白朱古力加覆盆子醬汁，表面仲加咗西西里開心果，口感豐富之餘唔會太甜。
茶店品牌 走杯
由旅遊達人Jerry.C開設嘅健康茶飲店，嚟緊五月將推出6款全新飲品，包括有特別加入梔子花粿子，有助清熱涼血及應對流感病徵嘅紅豆粿子の乳；提升免疫力嘅黃金薑蜜純鮮乳及100%全素嘅金鑽奇異の夜歌等。飲品店堅持選用健康天然食材，飲都飲得放心啲啦係咪？
文: Yanica