新派路線嘅粵菜館愈開愈多，銅鑼灣最近又新開一間走摩登風嘅粵菜館！餐廳佔地2,000平方呎，以玫瑰金及黑色為主色調，氛圍低調奢華；唔單止裝修，食物方面都有啲驚喜，主要供應多款新派創意菜式，如以西瓜入饌嘅百寶西瓜盅、釀入蝦膠嘅炸子雞及素叉燒等。

鴛鴦炸子雞($438)

炸子雞平時都中式酒樓都成日都有得食！但呢度嘅就係鴛鴦炸子雞，即係百花雞拼炸子雞，一半係普通炸子雞，皮脆肉滑，雞味都幾突出；而另一半就釀咗蝦膠，口感彈牙，叫呢款就一次過可以食到兩款菜式喇～

月下海龍($1,188)

同樣都係一餸兩味！選用足兩斤重嘅新鮮龍蝦，分別烹調成傳統廣東名菜大良炒鮮奶及鹹蛋黃炒龍蝦，大良炒鮮奶就比較清淡，更突然龍蝦鮮味；而鹹蛋黃炒龍蝦就香濃惹味。

秘製素叉燒($128)

大魚大肉後想轉吓口味，可以一嚐呢味素叉燒！餐廳用麵筋打造叉燒口感，再配上傳統粵式叉燒醬，口感同真叉燒又幾似。

牛油果川味辣子雞($188)

食粵菜比較少機會見到近年好HIT嘅牛油果蹤影，不過呢度就破格將牛油果加入川味辣子雞，能和中和辣味外，仲多咗份順滑嘅口感。

鮑汁鮑魚燴珍珠米($98)(兩位起)

加入原隻鮑魚，鮑汁滲透每一粒米飯，啖啖都係鮑魚味。

百寶西瓜盅($588)

雖然已經九月中但天氣仲係咁熱，最啱就係食西瓜！西瓜盅加埋上等花膠、螺頭同金華火腿等鮮味食材燉煮而成，解暑一流。

火焰干邑五鮮($388)

食中菜又點少得海鮮，呢道菜有齊帶子、鮑魚、象拔蚌、鮮魷及石班，仲有即場Fireshow睇呀～

月下酌 

地址: 銅鑼灣開平道1號Cubus 28樓

文、相、片: Yanica