由香港神樂院牛奶廠生產嘅十字牌牛奶，啱啱新出咗紙包裝奶茶，喺7-11同各大便利店及超市都有得賣！今次開飯仔仲一口氣試埋便利店其餘四個品牌嘅奶茶，睇睇每一款味道有咩分別！

（價錢以當日購入為準，可能略有出入）

十字牌地道奶茶 $7

包裝寫明新鮮無添加及香港製造，飲落唔算甜，茶香幾濃，奶味反而唔算好重，入口細滑嘅。

好飲度：★★★★

維他港式奶茶 $5

另一款本地薑，味道明顯較甜，但都容易接受。奶味亦重，質感都幾滑，味道平衡。

好飲度：★★★

雀巢焙煎奶茶　$6

一飲先有一陣甜味，aftertaste先有少少焙煎香氣。不過茶味淡薄，唔算特別好味。

好飲度：★★

POKKA優質奶茶 $7.5

馬來西亞製，採用錫蘭茶葉，色澤偏濃，但奶味及茶香均欠奉，甜到似糖水。

好飲度：★

統一阿薩姆原味奶茶 $10

台灣品牌，以印度紅茶及新西蘭奶製成，味道似珍珠奶茶，甜度極高，唔係人人接受到。

好飲度：★

試後感：唔係偏心，但十字牌味道確實幾突出，而且甜度唔高，應該幾啱香港人口味。而且成份只有水、奶固體、糖及紅茶粉，冇其他化學物，所以要放入雪櫃冷藏。