台灣菜或者西餐相信大家都食過唔少，但有無諗過將兩者特色糅合？牛肉麵變成慢煮牛肋骨配手作麵，肉燥飯選用英國西班牙橡果豬配台灣香米，班戟就淋上芝士奶蓋同珍珠！講緊嘅係呢間台式休閒餐廳同香港陀飛輪品牌聯乘新開嘅台式西餐廳，由裝修到食物都有新鮮感。
 

TeaWood Deluxe位於尖沙咀K11，由茶木·台式休閒餐廳同萬希泉合作推出，主打高級台式西餐。裝修風格以優雅古典為主，加上鐘錶齒輪、羅馬數字等元素，別有格調。
 

12小時慢煮牛肋骨台式手作麵·溏心蛋·海苔（$328）（每日限量供應10碗）

叫得做「升呢」版，用料同烹調方式都全方位改良！牛肋骨先用紅酒同多種香料醃製，再以65°C低溫慢煮12個鐘，最後煎至表面焦香。慢煮令牛肉口感特別軟嫩，帶少少脂香但唔肥膩。
 

湯底亦唔馬虎，用牛骨、花椒、八角、新鮮蔬菜等熬製，牛香濃郁，鹹味適中無油膩感。而麵條就係自家工場每日新鮮製作嘅粗身手作麵，彈牙煙韌得嚟亦做到掛湯效果。連蘿蔔等亦煮至入味。
 

酥炸排骨西班牙橡果豬肉燥飯·高麗菜絲沙拉（$138）

同樣係香港人食開嘅肉燥飯，呢度就用咗西班牙橡果豬肉，即係西班牙當地以橡果等作為糧食放養嘅豬肉，特色係油脂肥瘦均勻，肉質軟腍，令呢碗肉燥飯更香而不臊。
 

白飯亦特別用台灣直送嘅台稉9號米，粒粒飽滿分明、黏中帶Q。酥炸排骨亦特別挑選英國保濕豬肉，有特別保濕技術，保留更多肉汁。
 

威士忌乾炒三杯雞（$108）

傳統台式三杯雞嘅三杯係指醬油、麻油、紹興酒，但餐廳將紹興酒改為台灣近年大力發展嘅威士忌。更會席前加上點火威士忌增添香味！放心威士忌煮過之後只會留下酒香，食落唔會太嗆。外脆內嫩嘅雞肉配上淡淡酒香夠惹味。
 

 

燒美國肉眼扒(10oz)·台式沙茶醬（$258）

西餐亦加入台灣元素！肉眼扒燒香之後配上自家調製嘅燒汁同沙茶醬，同時可以試到經典西式口味同台式Fusion風格。半熟肉眼扒肉質嫩滑，點上帶蝦乾鹹香嘅沙茶醬又幾夾。
 

MTW黑糖珍珠舒芙蕾班戟·抹茶冰淇淋/香草冰淇淋（$88）（製作需時約30分鐘）

甜品亦有台灣Fusion風格，呢款舒芙蕾班戟裡面有吉士忌廉，上面就淋上芝士奶蓋同煙韌珍珠，而且可以按自己口味加上台灣黑糖漿，有啲似班戟版嘅奶蓋黑糖珍珠！
 

芝士奶蓋柔滑帶少少鹹香，珍珠煙韌而黑糖漿香甜，甜鹹有致而口感豐富。班戟口感輕盈鬆軟，略嫌唔夠入口即溶。
 

氮氣人蔘烏龍茶（$54/300ml，$78/500ml）

選用台灣人參烏龍茶，即係喺茶葉當中加入人參粉，味道甘甜生津，餘韻悠長，餐後解膩就最啱。餐廳更特別打入氮氣，產生好似啤酒咁嘅奶白色細緻泡沫，唔單止令茶湯口感更為細滑，亦有保鮮嘅效果。
 

人參烏龍珍珠奶茶（$52/熱，$56/凍）

鍾意飲甜啲嘅就可以揀珍珠奶茶，熱飲更以茶壺奉上，別緻優雅。奶茶香甜柔滑，配自家製珍珠增加咬口。

新店試業期間亦有推出優惠，即日起至4月11號，堂食惠顧滿$200再Like埋餐廳Facebook或Instagram，就可以用半價享用威士忌乾炒三杯雞！堂食惠顧滿$400就可以免費獲贈Mocktail一杯，每日各限30份。

TeaWood Deluxe
地址：尖沙咀河內道18號K11購物藝術館B1樓B105-B106號舖

文、相、片：Cathy