喺香港幾個人想搵間靜靜哋嘅Cafe唔容易，要喺銅鑼灣鬧市就難上加難。不過最近有間餐廳就有齊共用空間同特色房，買杯咖啡或者食個Lunch就可以用三個鐘！而且菜式選擇眾多，日式、西式各款小食、主菜一應俱全，去多幾次都未必試得晒㗎。
 

COSMOS@RedMR全新概念店，全層分為共用空間「THE SPACE」同29間特色房間。共用空間有窗邊嘅吧枱位，中間嘅枱櫈亦可以靈活運用方便唔同人數。而特色房間以四種Pastel Color為主，裡面可以唱K、開Netflix煲劇、睇波都得，鍾意點Hea點玩你話事！
 

札幌大蝦濃湯拉麵（Lunch Set $118）

全新概念店嘅Menu選擇非常豐富，首推呢碗札幌大蝦濃湯拉麵，湯底用鮮蝦熬三個鐘，有非常濃郁嘅蝦膏香。而幼麵唔單止掛湯，最難得嘅係Keep到彈牙唔會過腍。
 

和風咖喱炸雞飯（Lunch Set $98）

咖喱係唔少人嘅Comfort Food，呢度嘅咖喱醬汁香得嚟唔嗆喉，辣度同甜度平衡有致，撈飯食一流，炸雞亦夠香口。呢個Lunch Set包埋湯同飲品，夠抵食。
 

羽衣甘藍·煙雞胸·藜麥·車厘茄·意式油醋汁沙律（Lunch Set $98）

想食Light啲亦有沙律選擇，呢份就有齊羽衣甘藍同藜麥兩款Super Food，前者高效抗氧化又有多款礦物質，後者蘊含九種人體必需氨基酸，同時高蛋白低熱量。配埋瘦得嚟口感唔會太乾太柴嘅煙雞胸，啱晒Keep Fit或者健身嘅朋友。
 

Dinner Set（$198）

Dinner Set包括頭盤（流心蛋煙肉薯仔沙律）、爐端燒（紫蘇葉豚肉、雞軟骨、翠玉瓜）、主菜（三選一）同甜品（3.6北海道牛乳布丁），非常豐富。主菜推介黑松露蛋黃燒牛小排飯，牛小排嘅肉香加上黑松露醬嘅芳香，再撈埋蛋黃入口更香更滑！

黑松露炸薯條（$58，Dinner Set追加+$18）

如果係嚟煲劇或者睇波，點少得香口小食相伴先？呢份黑松露炸薯條唔單止薯條上面已經有黑松露碎，連點嘅醬亦有混入黑松露，外脆內軟嘅薯條配黑松露香氣真係無得輸。
 

招牌鵝肝蛋黃拌飯（$158）

另一款日式丼飯，以日式醬汁同鮮雞蛋配搭油香十足嘅鵝肝，記得連埋微辣嘅蔥絲一齊食，平衡返膩度，又不失香濃嘅味道。
 

 

特盛壽司拼盤 9件（$158）

壽司拼盤有齊唔少香港人都鍾意嘅三文魚、油甘魚、鰻魚、甜蝦、飛魚子，加埋間八魚、左口魚邊、蟹柳、玉子，無論自私食定同朋友分享都咁啱。
 

（左至右）牛舌（$52），雞軟骨（$38），雞翼（$52），汁燒牛肉（$58），日本溏心蛋串（$38）

呢度連香噴噴嘅爐端燒都有！日式爐端燒以帶出食材原汁原味為特點，就咁加少少海鹽已經夠香口，特別推介爽脆帶牛香嘅牛舌，同流心非常誘人嘅日本溏心蛋串！
 

Space Me（$108）

想飲返兩杯一樣得，呢款Cocktail係用咗自家浸製嘅菠蘿薑Rum酒，配搭Lillet Blanc、青檸汁、椰子水等。藍色Cocktail上面再加粉紅色棉花糖，搶眼之餘又Fancy，飲落酒香當中帶水果嘅清甜味，非常易入口。
 

Comos 特撰松竹梅 特別純米（$128/300ml）

食日本菜亦可以選擇配清酒！呢款清酒適合凍飲，米香淡雅口感纖細。
 

Moon River（$48）

呢款Mocktail其實係蝶豆花茶加橙汁，蝶豆花本身味道唔重，所以飲落以橙汁味為主，不過漸層賣相就最啱「相機飲先」喇。
 

Fresh Strawberry Smoothie（$48）

亦有唔同咖啡、茶同特飲選擇，呢杯士多啤梨Smoothie口感幼細，士多啤梨味道酸甜自然。
 

COSMOS@RedMR
地址：銅鑼灣謝斐道482號2樓

於開幕優惠期間，午市時間（11:00-17:00）客人惠顧午餐（$98起另收加一），可享用獨立房間3小時，之後每3小時$120/位另收加一^；17:00後惠顧晚餐 （$198起另收加一），可享用獨立房間3小時，之後每3小時$180/位另收加一*

^優惠只適用於首一節時間可延長至3小時，之後以$120/75分鐘計算另收加一，優惠至11月30日止

*優惠只適用於首一節時間可延長至3小時，之後以$180/75分鐘計算另收加一，優惠到11月30日止

文、片：Cathy
相：Cathy、相關機構提供