平日返工放工咁繁忙，周末放假時間梗係要好好善用啦！唔使去郊外離島、過大海甚至飛去外國至叫做遠離繁囂嘅，識得搵其實市區都有唔少悠閒舒服嘅抖氣位。開飯仔最鍾意捐窿捐罅發掘呢啲地方，今次公開自家私藏中上環一帶café list，搵個weekend約朋友去飲杯咖啡，放空又放鬆一吓啦！
自家咖啡特飲 Dear Neighbor
石塘咀、山道有唔少特色咖啡店，呢一間開業數月，地方唔算大，年輕主理人兼咖啡師熱情友善，希望將咖啡文化分享俾客人。店內有一系列自家設計嘅咖啡特調，Bitter Love以雙份特濃咖啡如雞尾酒般搖勻，加上奶泡、朱古力粉及朱古力醬，香甜又帶咖啡微苦。
型格水泥空間 SP_CE café & lounge
太平山街一帶係開飯仔好鍾意嘅地區之一，幽靜得來又有唔少獨立個性小店，好有格調。呢間普慶坊街角嘅café，以水泥牆身刻劃成四四方方嘅空間，完全冇多餘裝飾，好minimal。店子供應大路嘅咖啡，以及多士等輕食，質素雖未見突出，勝在自成一國夠靜侷，座椅放得疏落。
眼鏡店coffee corner Hazel & Hershey
Hazel & Hershey總店位於中環，呢間分店隱身於太平山街名牌眼鏡店Khromis內，即使唔買眼鏡都可以入來飲啡。圓角設計型格，可惜只佔一角，得一排梳化座亦冇枱，只能快飲或外賣。自家烘焙咖啡有水準，款式就有單品、意式及氮氣咖啡，香氣味道平衡。
半山綠洲 Blend & Grind
本來想避免用「隱世」一詞，不過真係隔涉，位於人車皆少嘅太子台。以意式咖啡為主，用本地名牌Redback咖啡豆，澳洲風味，味道香醇濃郁，奶泡亦打得細滑，唔飲咖啡亦有一系列鮮打smoothies可選。格局cozy，不過座位唔多，分分鐘專登去到冇位座。
圖：更多咖啡胖旅： |
文、相：Perrins
