灣仔呢間新店主打越式牛肉河，湯底用和牛等材料熬足16個鐘，濃郁香甜，難怪一到Lunch Time就大排長龍！除咗招牌牛河，豆漿冷河粉、和牛溫泉蛋飯，到小食春卷都有質素， 附近嘅扮工一族有口福啦。
 

Spring field店裡面有個半開放式廚房，睇到環境夠乾淨食得都安心啲。食材挑選嚴謹，例如M4/M5澳洲和牛、日本黑毛豬肉、越南河粉等，最特別嘅要數到湯底，係澳洲一間越南河粉老字號嘅配方，用和牛、牛骨、蔬菜，同草果、丁香、八角等藥材每日以慢火熬煮16個小時而成。
 

招牌春園河（$73）

用和牛湯底配搭安格斯牛肉、慢煮牛𦟌條同蘿蔔粒。半熟嘅安格斯板腱牛肉片口感柔嫩，而且肉香突出；牛𦟌條先用和牛湯慢煮再切條煨煮，入味鬆化；蘿蔔粒特別以鴨湯慢火泡煮，香甜軟腍。選用越南進口手造河粉，比一般河粉滑溜煙韌，亦無咁容易浸到爛晒。
 

而湯底入口先有陣陣藥材香，之後就有牛肉同蔬菜嘅鮮甜味，濃郁而有層次。配料本身已經有芫荽、紫洋蔥同蔥花。建議大家先試下原味，食到一半再按自己口味加入香料，呢度有鵝蒂(越南芫荽)、金不換、青檸同辣椒，食得辣嘅朋友可以再加餐廳自家製嘅辣芽菜，香辣爽口。
 

鹿兒島黑毛豬濃豆漿冷河粉（$78）

唔想食牛肉湯河嘅話，呢度仲有冷河粉！以豆乳麵為靈感，用越南河粉取代素麵，再用日本豆乳加調味汁製作湯底，鹹甜平衡得嚟又保留豆香。而鹿兒島黑毛豬肉質細膩有彈性，配豆漿湯底香而不膩。
 

 

火炙和牛溫泉蛋飯（$98）

和牛用嘅係M4/M5澳洲出產嘅神戶和牛肩肉，用火炙燒出牛脂香氣，再加埋半熟溫泉蛋嘅蛋汁，更加柔嫩香口！除咗牛肉片上面嘅紫洋蔥，仲另附一份越式青檸魚露沙律畀大家解膩，青檸魚露亦係餐廳自家製，微酸帶魚露獨特香氣。
 

招牌春園春卷（$36）

春卷炸至金黃香脆，裡面有豬肉、粉絲、木耳、甘筍等，口感豐富，配脆而唔油膩嘅春卷皮就啱啱好。加上有生菜同青檸魚露汁，係味道豐富又唔會太Heavy嘅開胃小食。
 

凍香橙紅茶（微糖）（$18）

呢度凍橙茶同凍檸茶都係微糖配方，橙茶比檸茶少一份酸澀，但依然清爽，解膩消暑。
 

最後溫馨提示，雖然和牛湯底同和牛肉係每日限量供應，但最近Lunch Time真係有唔少食客排隊，唔想等咁耐嘅話建議大家夜晚嚟呀。
 

Spring field
地址：灣仔汕頭街25號地舖

文、相、片：Cathy