望海景、食中菜，chill到好似食西餐咁？尖沙咀有兩間摩登中菜館，享盡地利，環境寬敞又有靚景，並以創新手法烹調傳統菜式同點心。無論係同朋友、同事聚餐，定帶屋企人去試新嘢，都一樣適合，齊齊感受全新嘅中菜用餐體驗。

南海一號（尖沙咀）　

位於iSquare頂層嘅呢間中菜館，樓底高、地方闊，空間感甚大，仲有全落地玻璃設計，可以飽覽270度嘅維港海景，淨計環境分都滿分。餐廳主力提供富南洋風味嘅創意粵菜，主打海鮮，更曾連續兩年入選米芝蓮星級推薦餐廳，食物質素有保證。

冰鎮鮑魚

一份三隻嘅冰鎮鮑魚，作為前菜相當稱職。大廚特地選用大連鮑魚，以日本清酒加梅子調配醬汁，再細心切成條狀，一嚟令鮑魚更能索盡醬汁，入味啲，二嚟亦方便進食。鮑魚新鮮彈牙，微酸中又帶有酒香。

極品蟹皇翅

以清燉雞湯煨翅，加埋即叫即拆嘅紅膏蟹肉，入口除咗有絲絲蟹肉食到之外，仲有陣陣蟹膏嘅香甜味，層次豐富，熱辣辣都可以好快食完。

鹽燒方利魚

坊間食到嘅方利魚多數都係以蒸煮嘅方法處理，口感較滑。不過呢度嘅師傅就別有一套方法，嚴選大約一斤四至斤半嘅方利魚再用鹽燒，燒出嚟嘅魚皮脆口，而魚肉則仍然可以保持到肉汁，啖啖香口，佐酒一流。

龍蝦湯泡貴妃飯

呢碗龍蝦湯泡貴妃飯認真大碗，份量十足，一啖食到又脆米又蝦肉粒又菜又湯……口感豐富，仲好鮮甜。烹煮嘅過程一啲都唔簡單，新鮮龍蝦、蟹肉、魚肉灼熟後再用人手搗碎㗎，然後以慢火煎香，加配料炸米、蝦粒、肉碎等大火煲多個半鐘，至脆米係最後上枱時先至撒嘅，務求做到最香脆嘅口感。點解要用人手搗碎？師傅解釋因為用機器打嘅話會打碎晒食物內本身含有嘅纖維，好心機呢！

金榜醬煮大蝦

大大隻越南虎蝦係吸引嘅，醬汁以香茅葉、南薑、椰汁、指天椒、芫荽粉等十幾種香料混製而成，椰奶味香，蝦肉索晒汁梗係鮮香彈牙啦。唔好漏咗個饅頭呀，點汁食仲好食過平時點煉奶。

囍公館（尖沙咀）　

同樣有落地玻璃窗欣賞180度維港景色嘅囍公館，則位於西九文化區，佔地6000呎，開放式設計令空間感覺更寬敞。餐廳主要分成幾大區域，分別係休閒用餐區、廚師發辦貴賓訂座區、酒吧等，定期會有本地獨立音樂人駐場演唱，即使係中菜廳都好有氣氛。而餐廳主要提供創意中菜。

清燉佛跳牆

傳統福建菜式佛跳牆，師傅以法國野雞同鵪鶉骨燉湯，經重複嘅吊湯步驟，熬出清澈而濃郁嘅湯頭，再特選陳釀女兒紅入饌，令到燉湯清甜以外，仲多咗重酒香。

燕窩雞豆花

呢道四川傳統宴會嘅菜式，有逾一百年嘅歷史，工序繁複，係一道相當花功夫嘅川菜。雖然菜式個名叫雞豆花，但卻係完全見唔到雞肉，點做到？師傅將雞胸肉攪碎，混合蛋白再塑形。叫「豆花」，就係口感似豆花咁幼滑呀。

煙燻片皮鴨

師傅喺傳統北京烤鴨嘅製法上加以改良，將青瓜同大蔥磨蓉，食嘅時候就比平時更能突出到鴨嘅香氣，但又不失蔥香同清爽。

黑松露炸子雞

炸子雞本身已經好香口，仲要以特調嘅黑松露醬同法蔥醬去點綴提味，就更加惹味。選用本地新鮮雞，雞肉嫩滑，而炸雞嘅精髓，當然就在於雞皮！炸到脆卜卜，而且難得地唔太油膩，間中食一次都唔怕太邪惡嘅。

黑金雪山包

除咗小菜，點心方面款款賣相都落過心思，好似叉燒包咁，造型似足個雪山，實在有別於傳統做法。以植物炭粉做成嘅包面上，再灑上糖霜，內餡則係滿滿嘅叉燒，外層鬆脆，內裡軟熟，口感豐富。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異