食拉麵又有新體驗啦！呢間由日本拉麵大師林隆臣開設嘅拉麵店今年一月進駐中環，最近引入大師大阪店熱賣嘅item雙子碗拉麵，除咗可以一次過試晒兩款冷熱鹽味拉麵，拉麵碗外型仲夠晒獨特，食拉麵之餘可以順便打埋個卡！
雙．禁果之鹽($138)
首先要講吓個碗先，呢個雙子8字碗係由大廚林隆臣構思，由京都匠人設計，由日本空運到港。因為呢個碗呈8字嘅關係，食客就可以一次過試晒兩款冷熱鹽味拉麵！
「禁果之鹽」冷湯底拉麵喺日本當地都好罕見，大師特別選用頂級魚貝類配以佢嘅自家秘製醬油，麵質彈牙，加上大量三文魚子，炎炎夏日食真係好爽！
熱湯底方面，海鮮鹽醬汁以四種甲殻類精華製成，再加上手工海鹽、清酒、帆立貝丶花蜆丶大蜆丶北海道產嘅真烏賊同乾貝等，啖啖鮮甜！
「禁果之鹽」冷熱鹽味拉麵($98)同時可以單點。
林隆臣特式辣味濃厚白湯杯麵(換購價$25)
大師今次仲帶埋佢嘅得意之作林隆臣特式辣味濃厚白湯杯麵到港，呢個杯麵喺日本贏得第十屆全國「未來拉麵」大獎冠軍，湯底以頂級日本米鴨及豚肉製成，加上秘製香料，味道濃厚～而香港店限量300個，想食就要早啲去啦！
店內單次消費滿港幣300元，即可以換購價港幣25元換購一個杯麵，每人每次限換兩碗，每天名額20個。
鯖魚湯香菇野菜海蝦拉麵($98)
以日本鯖魚熬製清湯底，加入虎蝦、紅椒絲、大葱、黃芽白、金針菇同冬菇提味，再加大量昆布，湯底鮮甜。呢款拉麵每日下午五點半後限量供應20碗，又係嗰句，想食要趁早！
今次餐廳亦新出三款小食，包括自家製米麴柚子漬大根($28)、麵豉香蔥黑豚腩肉($38)、自家製番薯脆波波($38)，叫返個配拉麵食就完美啦～
另外林隆臣大師喺五月底亦喺大阪成功創立姐妹拉麵品牌「純至派RAMEN PURISM」，供應好多大師拿手、但香港店並未有供應嘅拉麵，去開大阪嘅朋友可以去trytry佢！
地址: 中環威靈頓街27-29號元益大廈地庫
文: Yanica
相、片: Tom Li