太子以前有間36酒店，最近嗰度地下變咗間餐廳。而呢間餐廳，同樣充滿歷史感。門口係霓虹燈招牌，入面嘅裝修亦刻意保留vintage嘅元素，不過懷舊中又見新意，有嘢食有酒飲，有飛鏢玩又有boardgame玩！
Menu上嘅選擇都幾多，有啲都幾有特色，好似麻婆豆腐芝士焗薯條咁，薯條係比較肥仔，粗身啲嗰隻，份量唔嘢少，面頭淋上熱溶芝士同麻婆豆腐，熱辣辣嗰陣仲有拉絲效果。平時食薯條多數都係茄汁，再唔係就mayo，估唔到同麻婆豆腐都幾夾，不過如果可以再麻啲辣啲，咁辣椒仔女會再開心啲。
有薯條點可以冇漢堡？自家手作芝士辣椒和牛漢堡嗰塊扒呢，勁厚！食落肉汁好香，同埋佢啲辣椒係釀咗入塊扒度呀，所以啖啖都有啲啲辣辣地咁幾過癮。跟配嘅薯條就唔係麻婆豆腐啦，不過有黑松露醬點，一樣咁香口。
金沙蝦鹹蛋麵靜悄悄咁藏咗喺意粉/飯類入面，不過冇用㗎，鹹蛋就好似漆黑中嘅螢火蟲一樣咁鮮明，咁出眾，師傅炒香咗啲鹹蛋黃再淋上碟麵度，獨有嘅鹹香味就已經係咁飄出嚟！不過鹹蛋呢家嘢好蝦人食，食食下就會開始覺得膩，呢個時候就可以食返塊菠菜葉，清一清，又可以再作戰過啦yeah~
隻隻蜆都好巨嘅陳皮粉絲上湯浸托托蜆
至於嘢飲，晏晝嚟食個lunch都可以chill下。咖啡控可選冰滴咖啡吖，用香檳杯嚟裝又幾型。啲咖啡豆係選用自家烘焙嘅精品咖啡豆。
酒鬼仲開心，新開張期間，2點後飲手工啤酒買一送一！多間本地酒廠嘅酒都有供應，大熱天時想要啲fresh少少嘅，可以考慮麥子嘅香茅或者西柚。但如果係porter死忠，想要厚身啲嘅酒，就試下熊貓蜜語嘅mimi beer porter啦，聞同飲嘅咖啡、拖肥味都好濃下。
紅白酒、cocktail都有，招牌芳華隻薄荷綠色幾靚，係用菠蘿汁、椰子syrup、奶等調製出嚟，香香甜甜咁。但講到特別一定係朱奶，仲要用埋傳統嘅玻璃牛奶樽去裝，立下眼望落去真心會以為係朱奶，但查實係溝埋whisky同bailey’s嘅朱奶呀！
餐廳兩層高，樓上嗰層嘅感覺都幾唔同，又有飛鏢、又有貴賓房，仲有多款boardgame玩，感覺幾relax，有啲party room feel，都幾啱一大班朋友嚟gathering。
芳華絕代
地址：旺角界限街36號1-2樓
文、相：Kar
