喂，lunch落老蘭囉？唔係叫你去飲酒呀，叫你去食lunch兼做善事咋！深水埗明哥喺嗰度開咗間pop up店呀，有飯盒、飯票賣呀。
話說明哥間餐廳「北河同行」已經正式成為咗慈善社企，仲成立咗「北河(明哥)慈善基金」。記得之前訪問明哥嗰陣佢都話希望可以將派飯服務伸延到其他區，而家中環就係第一站喇！喺蘭桂坊嘅呢間pop up店，總共有9款飯盒，每日就會供應其中3款（包括1款素食飯盒），包括豆腐火腩飯、乾炒牛河、梅菜扣肉飯等等。每個飯盒大大盒，包食得飽，都不過係32蚊咋，喺中環嚟講堅係幾平。明哥話本嚟定28蚊嘅，但驚太平會影響到附近嘅食店先至調高少少。暫定每日會供應300個飯盒，然後再按實際情況調整。
另外都有飯票買嘅，24蚊張，飯盒同飯票扣除必要成本之後，全部都會撥捐畀明哥個慈善基金，希望可以幫到更多有需要嘅長者、基層同露宿者。
「北河同行．蘭桂坊慈善義賣限定店」義賣活動 (義賣飯盒及慈善飯票) 詳情：
日期：11月17日至12月15日 (只限星期一至五)
時間：11:30am - 2:30pm
地點：中環蘭桂坊1號地下大堂
文：Kar
回帶：
【專訪】派飯背後 深水埗明哥：我唔認為自己有愛心，我只係用心 (有片)
中環仲有咩嘢食：
【新店直擊】京都百年抹茶老店 今日登陸中環 抹茶怪焙茶怪出動！（有片）
【飲食潮流】蠟筆小新變搞鬼點心入侵中環尖沙咀！
【新店直擊】北海道人氣雙層芝士蛋糕登陸中環 一個蛋糕兩種口感（有片）
5間中環打工仔平價食堂