蛋包飯係日本嘅代表性菜式之一，而呢間1978年喺東京開業嘅蛋包飯專門店，更成為日本首間用滑蛋方式來製作蛋包飯嘅餐廳。品牌由日本昭和天王御廚秋山徳蔵嘅入室弟子窪田好直創立，糅合日法烹調方式製作和洋料理，嚟到香港除咗有招牌蛋包飯之外，亦增設香港限定口味。

每份蛋包飯用3隻蘭王蛋製作滑蛋，顏色好鮮明；然後按口味分別淋上蛋包飯汁、日式肉汁或咖喱汁。而飯底則跟足日本總店做法，先將日本米連同竹筍、洋蔥、粟米、香菇等8種食材，一齊放入秘製雞湯中先煮後烤焗，製成「原味飯」後再演變成3款口味嘅飯底。

3款蛋包飯飯底

炒焗飯：即原味飯，配香港限定蒲燒鰻魚蛋包飯

番茄飯：原味飯加入茄汁炒成，配肉汁或蛋包飯汁蛋包飯

咖喱飯：原味飯再加入提子乾、咖喱粉同炒，配咖喱汁蛋包飯

招牌蛋包飯

蒲燒鰻魚蛋包飯（$248）

香港獨家限定嘅蒲燒鰻魚蛋包飯，配上含蜆肉嘅炒焗飯幾有咬口；而且鰻魚厚肉大條，開心share都得，加埋鹹甜適中嘅鰻魚汁，唔會蓋過蛋包飯嘅鮮香味道。

肉汁漢堡扒蛋包飯（$238）

日本人氣款式肉汁漢堡扒蛋包飯則配番茄飯，而且一碟有齊秘製日式肉汁同蛋包飯汁，分別淋喺漢堡扒同蛋包飯上。2款醬汁都用牛肋骨、蔬菜等材料熬煮1星期，質感幼滑，但肉汁會特別加入甘味果實酒。漢堡扒用鹿兒島和牛同北海道和豚，以7:3比例搓成，入口juicy，唔會好油膩。

日式咖喱吉列豬扒蛋包飯（$228）

日式咖喱吉列豬扒蛋包飯係另一款富日本風味嘅款式，咖喱汁由日本運嚟香港，保證味道同總店如出一轍。加上北海道和豚油脂分佈均勻，用傳統吉列方式將和豚沾上日本蛋漿、炸粉同幼細嘅麵包糠後，以攝氏175度用植物油炸至金黃酥脆，同香甜嘅日式咖喱汁好夾。

滿天星肉汁安格斯牛扒蛋包飯（$298）

如果你鍾意鋸扒，可以揀滿天星肉汁安格斯牛扒蛋包飯。牛扒幾大份，女士獨食可能食唔晒，但喺日式餐廳食安格斯牛扒感覺上略欠風味，會比較期待配和牛扒。

輕食

左：蟹肉生菜沙律（$108）｜右：蝦肉牛油果他他（$138）

想點啲輕食平衡下嘅話，有沙律同刺身以供選擇。其中蟹肉生菜沙律有大量蟹肉、沙律菜同蟹籽，味道清甜，但加埋薯蓉一齊食會黏口少少。而蝦肉牛油果他他嘅蝦肉鮮味爽口，好啱而家嘅天氣食。

甜品＋飲品

｜雜果梳乎厘班戟（$138）

甜品方面，鬆軟嘅梳乎厘班㦸同芭菲都係受歡迎嘅款式。班㦸用日本香川縣小豆島橄欖蛋、日本麵粉同日本牛奶製作，挺身且空氣感十足；日式原味、朱古力香蕉、士多啤梨同雜果4款口味之中，味道酸酸甜甜嘅雜果口味可幫助消化。

抹茶芭菲（$108）

芭菲則推介大家試抹茶味，軟滑嘅抹茶雪糕配上紅豆、蕨餅、日式丸子同栗子，加埋底層嘅忌廉、脆脆等配料，口感好豐富。

左：朱古力奶昔（$78）｜右：士多啤梨奶昔（$78）

飲品有一般嘅咖啡茶飲外，重有奶昔系列。其中士多啤梨奶昔用上2球Mövenpick士多啤梨味雪糕、鮮牛奶製作，再配上忌廉、紅莓乾同士多啤梨片，入口香甜幼滑。另外重有朱古力、藍莓芝士蛋糕、炭燒咖啡等口味。

店內採用木系裝潢，環境優雅舒適，現時海港城員工出示有效員工證件，堂食即享85折優惠。

你亦可以選擇外賣自取，其中外賣限定2人同4人餐有齊前菜、主食、小食同飲品，相對抵啲。另外為免多人聚集，餐廳暫時可以安排喺商場外（海港城正門大電視下面）交收。

グリル滿天星
地址: 尖沙咀海港城海運大廈3樓OT301-301A號舖

文、相：Cathy.C