傳統越南菜可能大家都試過唔少，所以尖沙咀呢間全新越南菜館就主打糅合新嘅烹調方法同摩登賣相嘅創意越南菜，唔少係以傳統越南代表菜式為藍本，加入新元素，而且食材亦有講究，例如自製羅望子水，檬粉亦係每日新鮮到店，心思加分。
 

pho.dle.bar集越南湯河「Pho」式麵食「Noodle」同特飲酒吧「Bar」三大概念於一身，位於今年新開嘅PREMIERE Cinemas隔離，放工睇戲前去食個Fast Meal就最啱！
 

手撕豬肉捲餅（$78）

創意菜式之一，靈感嚟自北京填鴨，主角換成越南常見嘅豬肉。先用加入香料、越南五香粉嘅湯浸24小時，再慢煮18小時再拆絲，所以豬肉就咁食已經有淡淡香氣。配料就有炸豬皮、花生碎、炸蒜粒、薄荷葉同芽菜，醬汁係加入是拉差嘅蜜糖海鮮醬。
 

同北京填鴨一樣，可以按自己口味用薄麵皮包住豬肉、醬汁同鍾意嘅配料包埋一齊食。豬肉比油脂較多嘅鴨肉清爽，而且炸豬皮、芽菜等唔單止增加口感層次，亦令成道菜式更有東南亞風味，係非常豐富嘅醒胃小菜。
 

豬肉碎蝦米蒸粉包（$88）

半透明嘅蒸粉包裡面係豬肉碎、蝦米、木耳、甘筍等，外皮薄而唔會一夾就爛，外面滑溜而裡面係一粒粒爽口口感。蒸粉包本身味道比較淡，配炸蒜片同扎肉食就變得香口。
 

香辣燴牛肋骨配青木瓜沙律（$168）

牛肋骨以咖喱醬汁燴煮至入味，食落香辣惹味，而且肉質結實爽口，無平時食炆肉嘅油膩感。配搭嘅青木瓜沙律屬於涼爽嘅酸辣口味，進一步解膩開胃。
 

 

香茅牛肉撈檬（$82）

酸子水係餐廳自家調配，重點係羅望子要先浸水，磨碎取其汁液，再加入魚露等煮成。西冷牛肉醃好後就係加酸子水炒香，所以牛肉口感嫩滑，帶羅望子嘅獨特酸味。檬粉就係每日新鮮到店，確保新鮮彈牙。加上酸酸甜甜嘅撈檬汁同各種配料，酸爽而口感層次豐富。
 

大蝦炒有機糙米飯（$148）

大廚用有機糙米代替一般絲苗米，等大家食得更健康。難得嘅係食落無一般糙米太硬太乾嘅缺點，反而粒粒分明而且煙韌彈牙！原來炒飯用嘅青咖喱汁亦特別調配過，加上金不換、辣椒、薑絲、檸檬葉等香料，香味十足而且辣味後勁都幾重。
 

椰香芒果班戟卷（$58）

甜品選擇貴精不貴多，呢款椰香芒果班戟卷嘅擺盤就好有西式感覺。其實係用Crepes包住燒過嘅椰絲同芒果粒，淋上用蛋黃、糖同酒煮成嘅沙巴翁醬汁，綴以椰漿同黑白珍珠。上面再加雲呢拿意大利雪糕同色彩繽紛嘅椰糖絲。沙巴翁醬汁用火槍燒至微暖，同雪糕一暖一凍形成刺激。Crepes亦相當薄身，如果裡面嘅芒果肉可以再多返啲就更好喇。
 

越南豆手沖滴漏咖啡（$58）

顧名思義，餐廳選用越南咖啡豆，味道特別香濃醇厚。而且由店員席前用聰明壺手沖，品質穩定之餘更唔會流失咖啡嘅香氣。
 

pho.dle.bar
地址：尖沙咀柯士甸道西1號圓方2樓2132號舖

文、相、片：Cathy