望住個海食飯總係特別舒服！尖沙咀最新開咗間無敵海景西餐廳，仲設有戶外露台同室外座位，特別日子或慶祝紀念日固然啱晒，閒時去chill返兩杯都唔錯。呢間餐廳以燒烤為主，同時糅合新派法國烹調技藝，由扒類到甜品一樣吸引！

 牛油果羽衣甘藍藜麥蘆筍沙律配柚子醋 ($118)

清新健康嘅沙律，一向都係女生們嘅最愛。呢款選用黑藜麥、紅藜麥、白藜麥三色藜麥置底，再混入新鮮蘆筍、牛油果、羽衣甘藍，口感豐富，綠得嚟都好有層次。

 牛肉他他配酸種麵包 ($158)

以澳洲牛柳加入生蛋黃、洋蔥、酸豆等製成嘅生牛肉他他，仲有專人喺餐枱旁即時製作，望住佢將各種食材撈勻，食慾大增。配埋自家焗製酸種麵包一齊食，特別清爽開胃。

 香煎帶子配脆皮豬腩肉、咖喱椰菜花蓉、酸豆及金葡萄乾 ($218)

呢道菜名相當長，亦都代表咗佢有相當多嘅食材配搭。煎香咗嘅帶子味帶鮮甜，慢煮脆皮豬腩肉軟腍香口，側邊黃色醬唔係黃芥末，而係blend咗嘅咖喱椰菜花蓉，感覺創新之餘，又有陣陣菜香，都幾夾。

 美國西冷扒  300g ($488)

食肉獸嚟到梗係要揀肉啦~ 餐廳致力搜羅嚟自美國、阿根廷、日本、英國等多個國家嘅肉扒，有乾式熟成都有濕式熟成，仲引入西班牙頂級烤爐Josper Grill同埋日本木炭，令肉質鮮嫩同時保留大量肉汁。咁多款扒入面，首推性價比高嘅美國西冷，肉味夠晒香濃，面頭嘅辣椒牛油仲好有特色！

 反烤蘋果撻配酸奶油 ($158)

蘋果撻食得多，咁反烤嘅蘋果撻呢？功夫繁多，喺撻皮上逐一鋪上經糖煮過嘅蘋果同肉桂條，放入焗爐焗製後，冷卻再將撻底反轉。師傅特意選用紐西蘭蘋果，味道酸酸甜甜，撻底又夠酥脆，配埋法式酸奶油中和一下，甜度剛好。

喺咁chill嘅環境點少得靚靚cocktails？紫紅色嘅Shades of Ray，以vodka、杏仁、紅菜頭同新鮮青檸調製而成，帶微酸；Sherry Cobbler則由Fino雪利酒、新鮮西柚汁、St-Germain 接骨木花利口酒、新鮮菠蘿汁同蜂蜜水調成，清爽好啱夏天飲。

唔想要酒精嘅話，mocktail都有多款選擇，好似Staycation就混合咗新鮮甘蔗汁、新鮮菠蘿汁、椰子和青檸，椰香頗重；Vida Verde一睇就知係refresh型，由Seedlip Garden 108同埋Mediterranean tonic水混合而成。

Harbourside Grill
地址：尖沙咀廣東道3-27號海港城海運大廈4樓OTE 401號舖

文、相、片：Kar