大熱梳乎厘班戟唔單止越開越多間，連口味都變得多元化。呢間喺葵廣起家嘅抵食梳乎厘班戟店最近就一口氣推出四款期間限定口味，有清幽茶香，亦有吸引流心選擇。即睇開飯仔試食報告啦！
伯爵茶梳乎厘班戟（$35）
Bove全線分店推出嘅四款期間限定口味有：竹炭黑芝麻梳乎厘班戟、雙重芝士梳乎厘班戟、伯爵茶梳乎厘班戟，同蜜桃茶梳乎厘班戟。當中開飯仔就覺得伯爵茶梳乎厘班戟最值得一試，即叫即整熱辣辣出爐，梳乎厘班戟鬆軟而且食到一粒粒Twinings茶葉，茶香濃郁唔過膩。
竹炭黑芝麻梳乎厘班戟（$35）（配白朱古力果仁餡料+$10）
而如果想試有流心餡嘅話，就可以點竹炭黑芝麻梳乎厘班戟。黑色外表夠搶眼，不過略嫌食落無乜芝麻或者蛋香。裡面可以配白朱古力同果仁餡，流心效果唔錯，再加埋上面嘅忌廉同Oreo碎，口感豐富。
更多【飲食潮流】： |
雙重芝士梳乎厘班戟（$45）
另一流心選擇就係雙重芝士梳乎厘班戟，其中一塊係三色芝士口味，三色芝士分別係Cheddar、Mozzarella同Parmesan，三款芝士混合起嚟有芝士鹹香之餘，又做到牽絲效果。而另一塊係軟芝士，趁熱食夠流心，因為軟芝士嘅鹹味唔明顯，食落會偏甜少少。
蜜桃茶梳乎厘班戟（$35）
最後仲有粉紅色嘅蜜桃茶梳乎厘班戟，一樣有一粒粒茶葉碎。不過開飯仔就覺得甜味唔夠另外幾款自然，顏色亦比較人工Feel。最後記得留意四款期間限定口味都唔可以另加流心餡呀。
Bove x Modos
元朗又新街38號恆富大廈地下15號舖
九龍灣牛頭角道77號淘大商場地下G128號舖
文、相、片：Cathy