旺角呢間新店走簡約風格，睇落以為係普通咖啡店，但其實主打現代日本茶飲！抹茶、焙茶嚟自宇治，獲日本JAS有機認證！必試Cafe自家製，茶香濃郁嘅抹茶軟雪糕；同參考日本最新流行，創作嘅氣泡檸檬抹茶飲品，消暑一流。
 

Cafe Hachiko供應咖啡、日本茶飲、軟雪糕等，抹茶、焙茶同煎茶選用日本Brook's Cafe出品，都有JAS（日本農業標準）有機認證。抹茶同焙茶飲茶更由店員即場用茶筅刷茶，保留上面細密嘅泡沫。
 

宇治抹茶軟雪糕（$30）

軟雪糕選用宇治有機抹茶製作，上面會再撒上一層抹茶粉，入口茶香同甘味都非常濃郁，甜度適中唔會蓋過回甘。值得一提嘅係Cafe特別用高級雪糕機，唧出嚟嘅軟雪糕特別挺身，口感幼滑綿密。唯一扣分嘅就係軟雪糕融得比較快，想「相機食先」嘅朋友記得快手啲！
 

宇治氣泡抹茶檸檬（$33）

抹茶飲品有多款選擇，呢款就以日本最近流行嘅檸檬抹茶為靈感，用青檸汁、自家製梳打水、現刷宇治抹茶配檸檬片，製作出呢杯有氣泡口感嘅宇治氣泡抹茶檸檬。抹茶嘅回甘同檸檬嘅酸味估唔到又幾夾，冰涼醒神。
 

日本焙茶拿鐵（$36）

焙茶近年亦開始廣受歡迎，呢杯焙茶拿鐵就以明治4.3牛奶加上現刷宇治焙茶，形成搶眼漸層。飲之前記得先搞勻，焙茶味道甘甜，帶焙煎香氣，加上牛奶口感柔滑，怕苦味嘅朋友都啱飲。
 

 

手沖日本有機玄米茶（$22）

咖啡同茶飲都有手沖同冷萃選擇，例如呢杯煎茶就用原片茶葉以玻璃聰明壺沖泡，好處係更容易控制分量同茶嘅濃淡。玄米茶味道甘甜，口感清爽。
 

黑糖波波奶茶（$26）

Cafe亦有供應香港呢兩年大受歡迎嘅芝士奶蓋茶同黑糖波波茶，呢杯奶茶係烏龍茶底，比紅茶多一份清香，配黑糖亦唔會太甜膩。珍珠口感都幾煙韌，唔會話太腍或者太硬。
 

Cafe Hachiko嘅店名嚟自忠犬八公嘅故事，Cafe老闆係愛狗之人，而且日本茶同八呢個數字好有關係，因為日本人相信立春後88日採摘嘅新茶最甘甜呀。
 

Cafe Hachiko
地址：旺角花園街2-16號好景商業中心20號舖

文、相、片：Cathy