一年一度嘅情人節進入倒數階段，今年無咗晚市堂食，加上疫情嚴峻，如果想兩口子留喺屋企慶祝，不妨考慮外賣情人節套餐撐抬腳！部分餐廳仲有外賣自取或者早鳥折扣優惠，食抵啲又安心啲呀。
人均$500以下
意式家庭味道 Da Filippo Trattoria
呢間位於尖沙咀嘅餐廳以「正宗傳統意大利人嘅家庭味道」為宗旨，新鮮自家製作嘅意大利粉口碑唔錯，今次情人節套餐就可以食到！由前菜、沙律、餐湯、意粉、主菜到甜品一應俱全，主菜更可以選擇BBQ醬烤豬肋骨、經典香烤和牛西冷牛扒或櫻花蝦蕃茄牛油汁煎三文魚扒啊。
情人節套餐
供應日期：2月11日至16日
價錢：$888/兩位（可享8折）
食盡日本時令魚鮮 丸十寿司日本食堂
鍾意食日本菜嘅話就可以留意呢間餐廳嘅情人節套餐，嚴選日本時令魚鮮炮製多款壽司及手卷，套餐包括前菜、三文魚他他沙律、三點刺身、壽司四貫、海膽吞拿魚蓉金箔手卷、黑松露茶碗、鵝肝鍋巴同及海鮮土瓶湯，精緻又豐富。
丸十情人節套餐
供應日期：2月11日至16日
價錢：$888/兩位（外賣自取可享85折）
正宗新加坡風味 JOM
想有啲新意就可以試下灣仔呢間舊年12月新開嘅新加坡餐廳，採用傳統食譜同自家製參巴醬，風味獨一無二。好似今次五道菜情人節套餐就有自家製水粿、辣椒蟹饅頭等，主菜可以選擇招牌南洋燒雞或馬來紅咖喱雞，最後重有九層糕做甜品。
五道菜情人節套餐
供應日期：2月12日至14日
價錢：$520/兩位
早鳥優惠85折 Angel & Devil 
觀塘呢間酒店餐廳今年亦推出情人節套餐，提早預訂仲有早鳥優惠啊！六道菜包括阿拉斯加皇帝蟹、香炸廣島蠔、慢煮鮑魚，主菜重可以揀香煎鹿兒島和牛或挪威極光蟹蓋，以白朱古力慕斯配雙層雜莓熱情果黑朱古力拿破崙畫上甜蜜句號。
情人節套餐
供應日期：2月13日至14日
訂購電話：3103 3808
價錢：$398/位（兩位起）（2月9日前預訂可享85折早鳥優惠）
蘭桂坊意式風情 Ciao Chow
情人節當然要同最愛分享美味，呢間意大利餐廳就推出五道菜共享套餐，食齊頭盤、即製意大利麵、薄餅及主菜，同甜品，紅菜頭羊奶芝士意大利雲吞以紅菜頭染上紅色好有情人節Feel，番茄水牛芝士薄餅就勝在簡單好味。
情人節五道菜共享套餐
供應日期：2月12日至15日
訂購網站：shop.lkfe.com
價錢：$988/兩位
人均$500-$1000
美式海鮮大餐 Red Lobster 
呢間嚟自美國、主打海鮮特別係龍蝦嘅餐廳推出情人節套餐，以期間限定嘅黃金虎蝦卷同金黃酥脆嘅夏威夷椰子蝦作為頭盤，主菜就係經典美式蒸活龍蝦同大蝦意粉，最後以野莓酥餅作為飯後甜點，再送上限量版心型車打芝士鬆餅禮盒，保證滿足。
情人節套餐
供應日期：2月11日至14日
價錢：$1,024/兩位（外賣）$999（堂食）
星級名廚主理 Amelia
餐廳由米芝蓮三星名廚Paulo Airaudo開設，主打新派歐陸料理。情人節套餐以法國聖馬田鮮蠔配魚子醬作為餐前小菜，然後有炭烤八爪魚配意大利沾醬等四道前菜，主菜則可選擇澳洲和牛牛柳配黑松露或蜜汁味噌緬因龍蝦。甜點為70%朱古力果仁脆脆蛋糕配士多啤梨雪糕，甜而不膩。
情人節套餐
供應日期：2月11日至15日
價錢：$1,960/兩位（外賣自取可享7折）
中環新派居酒屋 Kyoto Joe
呢間居酒屋就主打現代日式料理，總廚從日本搜羅各款新鮮時令食材，炮製一系列佳餚。今次嘅七道菜情人節精選套餐就包括套餐包括磯煮鮑魚伴三文魚籽、櫻花蝦配蟹肉沙律、刺身盛合、燒北海道鱈場蟹腳配露荀及仙台和牛西冷薄片配芥末醬等。
七道菜情人節精選套餐
供應日期：2月12日至15日
訂購網站：shop.lkfe.com
價錢：$1,960/兩位
文: Cathy.H
