麻辣火鍋熱潮漸漸緩和，最新一輪大熱食物相信會輪到佢！同樣係源自成都，由麻辣燙進化而成嘅串串香，專門店遍佈大陸，而其中一個最出名嘅就係呢間鋼管廠五區小郡肝串串香喇！1987年開業，於全國有超過300多間分店，今年大紅更有望超越700間！
店名咁長，其實源自創辦人顧大姐曾於鋼管廠五區工作，更曾為著名藝人劉曉慶同事，因為售賣家鄉麻辣燙打出名堂，後來結合四川麻辣火鍋，將麻辣燙升級，就成為呢一種串串香嘅食法。
食串串香唔同一般麻辣燙，首先去自助櫃自取食材，有成50款式任揀，包括肉類、蔬菜等，每一串都有40cm長竹籤串住，每串一至兩件，部份食材就用兩支甚至三支籤。竹籤係特別訂造，每次用完經3次消毒先重用。香港店嘅食材大都係用返本地貨，確保新鮮。
最出名嘅係經典小郡肝，選用本地新鮮雞胗製作，只用中心最軟嫩部份。以成都運來醃料醃製，再由5位師傅以人手拍鬆，再加辣油密封冷藏8小時先串起保證入味。另外仲有多款牛肉串，有麻辣牛肉，亦有包住唔同配菜好似香菜牛肉、泡椒牛肉、魚腥草牛肉、芹菜牛肉、茅根牛肉等，同樣經長時間醃製，味道幾濃烈吓。
湯底就有麻辣大紅鍋、或者拼酸菜、雜菌及蕃茄做鴛鴦鍋。麻辣大紅鍋湯底由成都運來，以豬骨配合紅油、辣椒等，味道香辣但就唔麻，辣味柔和唔會太搶。
最地道食法就係一次過放幾十支入鍋中，棟起再用杯蓋實，大約淥兩分鐘左右就食得！記得食法唔係成支用口食，而係用筷子將食物夾出來食。
唔夠味可以加醬油、麻油等調味，不過個人覺得食材本身已好濃味，唔使再點醬都已經夠。
小郡肝質感好爽口，辣味微微滲出嚟，一口一粒，真係不知不覺食咗好多粒！牛肉味道都帶微辣，食完就將竹籤放入筒內，每100克$75，大約係20支左右。唔食串串亦可以柯打火鍋配料打邊爐，選擇都幾豐富，有超過50款海鮮、牛肉、內臟等配料。
舖頭好多充滿中國風嘅佈置同埋餐具，加上咁特別嘅食法，成都店最高峰要排兩三個鐘，唔知香港又會唔會掀起串串香熱潮呢？
地址：銅鑼灣軒尼詩道502號黃金廣場9樓全層
文、相、片：Perrins