香港老飯店
餐廳主打正宗滬揚川菜，由行政總廚孫富利主理，所有菜式力求完美，希望顧客食得開心又放心。
腐皮素卷
腐皮卷平時食點心就見得多，呢道小菜腐皮素卷以上好黃豆製造，外表酥脆，包裹住紅蘿蔔、中國芹菜及芽菜等材料，口感爽脆。只加入少量鹽及用上湯開淡咗嘅豉油提鮮，鮮味盡顯。
素雞津白
呢味菜睇落簡單平凡，但其實選擇食材同熬湯都好講究㗎。特意選用最幼嫩嘅津白，蒸熟至淋，素雞同樣選豆漿中最嫩嘅位置，最後以自家熬製嘅少鹽清雞湯打芡，兩者同時吸收晒雞湯嘅鮮味。
雪塔燕窩
燕窩就啱晒各位女士們食啦～大廚師將蛋白發成泡狀，囗感軟滑，煮嘅過程中無加任何油，改以上湯調味。而燕窩就以少許海鹽同冰糖提味，食完真係會變靚啲。
全線分店：https://www.openrice.com/zh/hongkong/restaurants?chainId=10001603
The Chinese Library
餐廳位於大館東翼，裝潢高貴優雅，帶有殖民地色彩。菜式由行政總廚李振龍師傅主理，擅於為菜式加入無限創意。
拍薑星斑腸
平時食腸粉好多時都會放肉，而呢度就用星斑取替。餐廳用最傳統嘅拍薑同蔥段為星斑提鮮，肉質嫩滑仲夠惹味。而腸粉豉油都係自家製，加入用西芹、菇類及甘荀等材料熬製嘅湯汁開淡，多咗份自然甜味。
煙燻四喜素卷
四喜素卷係傳統上海菜，呢度嘅腐皮無經過油炸，食落去就輕盈啲～餡料包括冬菇、蒿筍及蘿蔔，只加少許鹽及糖作簡單調味，為咗令味道無咁單調，特別使用香片茶葉煙燻，最後加入少量麻油調味，味道香濃。健康之餘素食人士都可食用。
荷塘彩蔬
呢味菜主要希望食客食返蔬菜本身嘅甜味，所以鹽及糖嘅份量都唔多。而且特意選用硬身有機蔬菜，如蓮藕、百合及雲耳，口感會更爽脆。
地址：中環荷李活道10號大館1座1樓
電話：2848 3088
鴨大哥
餐廳主打片皮鴨，亦有供應少鹽少糖嘅片皮鴨菜式，坊間真係比較少見。
脆鴨皮配煙燻溏心鴨蛋
喺出面食片皮鴨，多數都係配餅皮及海鮮醬食，而呢度就將鴨皮放上煙燻溏心鴨蛋一齊食，香脆之餘帶蛋香，而且比以往所需少落四份之一糖。
海味雜菜煲
雜菜煲聽落味道單調，但師傅加咗海味一同熬煮，味道更豐富惹味。除咗海味外，仲加埋靚蝦干及瑤柱提鮮，所有蔬菜都吸收晒湯汁嘅鮮甜！
蛋白瑤柱炒飯
平時對炒飯嘅印象多數都係偏油同重口味，呢度嘅蛋白瑤柱炒飯絕對可以打破既定印象！炒飯只係落咗少許鹽及糖，味道主要來自瑤柱及蛋白，先浸瑤柱，再將瑤柱同瑤柱水一起蒸，其後用菜刀將蒸腍了嘅瑤柱壓開成絲，鮮味會更突出。而且炒飯用砂鍋呈上，食到最後一啖都係熱辣辣！
地址：銅鑼灣勿地臣街1號時代廣場10樓1001B號舖
電話：2882 8600
* 資料由客戶提供