香港人一向都好鍾意食日本嘢，壽司呀、刺身呀、鐵板燒呀咁，仲有拉麵！鍾意到甚至會喺間人氣拉麵舖門口大排長龍，排個幾兩個鐘先食到一碗十分鐘就食完嘅拉麵都冇問題；鍾意到特登搭車山長水遠入去元朗食碗備受推介嘅拉麵都冇問題。BTW，各位拉麵控，有口福了。原來組合C AllStar嘅成員之一，Jase都係拉麵控，仲自稱拉麵哥，經常四出搜尋出色嘅拉麵。今次，佢就揀咗兩間豚骨湯界嘅表表者嚟同大家介紹一下。
位於中上環九如坊嘅呢間拉麵小店，店主兼大廚Yamazaki係日本人，大約5年前嚟到香港開舖。呢度嘅豚骨湯拉麵湯底，用100% 嘅豬骨去煲，每日熬成10個鐘以上，所以飲落豬骨味極之濃厚但又唔會太油膩。
拉麵哥點評：
湯底：好rich、好creamy、有啲milky嘅感覺，呢間舖嘅致勝之道就係在於呢個濃厚湯底。
拉麵：豬骨湯拉麵一定係配幼身啲嘅拉麵，但幼唔等於腍。嚟到一定要嗌超硬麵，texture幾好咬口，有嚼勁。
溏心蛋：好流心，係一隻優質嘅溏心蛋。
叉燒：火炙豬腩肉同梅頭，火炙嘅做法更加能夠逼出豬腩肉嘅油份，好鬆軟，一啲都唔乾身。
追加：明太子高菜，撈勻後就食得，啱晒重口味嘅朋友。另一個值得喪落嘅係辣芽菜，一啖麵一啖辣芽菜係幾有另一番風味。
地址：中環九如坊14號地下
至於另一間得到拉麵哥歡心嘅，就係呢間喺銅鑼灣嘅拉麵店。不過想食到推介嘅黑丼，都唔係咁容易，事關每日只係限賣15碗，仲要得lunchtime先供應咋。呢碗黑丼，淨係湯底都要煲成廿一、二個鐘，可以想像到佢個味係幾咁濃郁。而成日話魔鬼在細節，呢度嘅溏心蛋，用上醬油同味醂去醃製，加上嚴格控制水嘅溫度同煮嘅時間，令到隻蛋食出嚟流心之餘，仲有絲絲嘅甜。
拉麵哥點評：
湯底：拉麵嘅靈魂，除咗食到豚骨嘅骨膠原同濃厚嘅味道，佢嘅豚骨味同甜醬油嘅融合，令到成件事都有啲甜甜地，好有特色。
溏心蛋：流心度夠高，醃製調味中帶有甜味，最啱佢口味。
叉燒：梅頭肉，非常鬆化，完全唔會有乾身嘅感覺。
地址：銅鑼灣堅拿道西23號地舖
文：Kar
相：Calvin Kwok