觀塘工廈多餐廳是常識吧，今次呢間新店就走日式簡約路線，選用日本實木家具，加上植物擺設，感覺非常舒適。請嚟經驗豐富嘅大廚坐陣，設計多款西日Fusion菜，午市套餐有水準之餘，甜品同飲品都落足心思。嚟飲杯咖啡打個卡，或者慢慢享受Lunch都得。
 

Relish佔地約1,500呎，有室內同室外露天座位，亦有售賣日本雜貨嘅小物區。枱櫈係請本地傢私店挑選嘅日本飛驒實木家具，鍾意嘅話仲有得訂同款呀。食物方面由擁有多年酒店餐飲經驗嘅大廚Caleb主理，以西餐嘅烹調方法糅合日式食材。雖然暫時未做到晚市堂食，但大廚就預告晚市會行預約制，主打五道菜嘅Tasting Menu，以日本時令食材為主。
 

西京燒比目魚配炒野菜·香草烤新薯（$168），Relish Iced Tea（Lunch Set+$12，單點$52）

最受歡迎嘅Lunch Set之一，主角係以西京白味噌、味醂等調味醃一晚再焗嘅西京燒比目魚，啖啖魚肉非常柔嫩，味噌嘅鹹香帶出魚肉鮮味，魚油豐富但毫無油膩感。上面以炸番薯片增加香脆口感。

Lunch Set包括主菜、沙律/湯同飲品，沙律選用餐廳獨家引入嘅日本九州産紫蘇籽油調味，香味清爽淡雅，湯就會不時更換款式。飲品開飯仔就揀咗Relish Iced Tea，係用夏威夷冰茶同Earl Grey兩款茶底，加新鮮蘋果汁搖成，再加上青蘋果片，果香怡人。
 

慢燒蜜糖芥末烤法國春雞（半隻）配野菜·香草烤新薯（$148）

法國春雞燒過後唔單止保持到肉質嫩滑多汁，脆、薄而富油香嘅雞皮亦係一大亮點。蜜糖芥末醬味道係酸甜中帶微辣。雞肉下面嘅野菜有珍珠筍、秋葵等，令菜式更清爽亦更有和風感。
 

軟殼蟹野菌松露忌廉汁意粉（$128）

Lunch Set Menu會不定期更換，好似呢款就係新推出嘅軟殼蟹野菌松露忌廉汁意粉。以白松露醬、忌廉、野菌等煮成松露忌廉汁意粉，加入巴馬臣芝士令醬汁更Creamy，再加上炸至金黃香脆、手掌咁大嘅原隻軟殼蟹！一上枱就聞到好香濃嘅松露香，而軟殼蟹非常酥脆又唔乾，加埋一齊好香口。
 

Keto巴斯克焦香芝士蛋糕（$58/件）

甜點貴精不貴多，熱賣之一係呢款適合生酮飲食同低醣飲食嘅巴斯克焦香芝士蛋糕。一方面廚師用零升糖指數嘅羅漢果糖代替砂糖，另一方面以杏仁粉取代麵粉，連忌廉都無落到砂糖，所以糖尿病病人都食得！蛋糕口感軟滑，食落有芝士嘅奶香同少少鹹香，如果焦香都可以再明顯啲就更好喇。
 

 

特濃咖啡提拉米蘇（$58）

Tiramisu亦係自家製，用咗餐廳嘅House Blend Espresso、杏仁酒同咖啡酒製作，所以食落先有咖啡嘅香醇，同少少花果香氣，然後慢慢滲出酒香。而且手指餅唔會浸得好軟，令口感層次分明。
 

Latte（單點$40/熱、$42/凍）

House Blend係埃塞俄比亞水洗同巴西日曬豆拼配，沖成Latte帶榛子同焦糖香，甜度適中而且風味乾淨。
 

Shakerato（$48）

凍咖啡中比較特別嘅有呢杯Shakerato，用House Blend Espresso加糖同冰搖成，形成一層細緻嘅泡沫，亦令咖啡口感更豐盈。
 

餐廳大廚Caleb

售賣日本雜貨嘅小物區

Relish 
地址：觀塘鴻圖道63-65號鴻運工業大廈5樓B號舖

文：Cathy
相、片：Tom Li