打完邊爐會熱氣就聽得多，但原來打邊爐都可以美顏？啱呀！有間嚟自新加坡嘅火鍋店，正正就係主打養生美顔湯底，而且成間舖嘅裝修仲係以夢幻粉紅做主題，啱晒各位貪靚女生。一家大細都啱㗎，事關餐廳設有室內兒童遊樂場畀小朋友玩。

打邊爐最重要嘅係湯底，美滋鍋提供6種唔同養生嘅湯底，集各家之大成，將四川麻辣香料、台灣藥膳湯底同日本涮涮鍋文化集於一身。

招牌當然係膠原蛋白養顏美容鍋啦，以瑤柱、雞肉、雞腳、豬手豬骨等熬製超過8個鐘，一聽啲材料就知道呢個湯底有豐富骨膠原喇！建議可以喺淥嘢食前先飲一飲個湯，好清甜啊。另外好多人都鍾意食麻辣火鍋，呢度都有！雖然係養生健康版，加入埋多種中藥好似人參當歸嗰啲落去製，但呢個滋補養生香辣鍋（豬骨湯）一樣有辣勁，一樣滿足到辣椒仔女。

至於食材方面，牛呀豬呀當然唔少得啦，手切牛小排同西班牙黑豚五花肉都富有肉香。

滑口嘅牛骨髓，又係一道富骨膠原嘅食材；食內臟嘅朋友應該會鍾意新鮮肥鵝腸，爽口啊。

魚三角好滑身呀，不過有時就可能多骨咗少少，食時要小心。蟹子魚滑又係另一道非常滑口嘅食材，仲幾彈牙添。

活醉海花蝦則非常新鮮生猛，而且餐廳仲特設專人剝蝦服務，好貼心呢～各位懶剝殼嘅朋友仔，坐定定等食就得了。不過醉蝦就略嫌唔夠酒香，比較淡口。

 炸響鈴及台灣新鮮鴨血

調味料同醬料係最佳嘅綠葉，呢度有超過廿款選擇，多到唔知點揀？唔緊要，餐廳有官配，教埋你各種醬料配搭嘅比例添~ 升級就可以享用喇，兼有時令生果食添~

BTW，等嘢食熟嗰陣，可以叫住原條鱆紅活魚同新加坡黃金魚皮等食住先喎。前者份量十足，打卡夠震撼得嚟魚肉亦鮮爽，餐廳仲特設醬油，建議可點埋蘿蔔蓉等一齊食，鮮味更突出。

想食嘅朋友就快手喇，6月10-23期間，餐廳推出特別優惠，女生嚟食全枱食材有折呀！如果一個女生（要18歲以上喎）就9折，兩個8折，如此類推，最多成枱可以有5折呀！要拖多幾個女女嚟先得咯！另外，呢間餐廳嘅OpenRice網上訂座服務亦即將推出喇留意返，到時就唔使排隊等咁耐lu~

美滋鍋   (即將)
地址：旺角登打士街56號家樂坊8樓803號舖

文、相、片：Kar