素食嘅朋友，而家出街食都愈嚟愈多選擇。話說上環又有間新嘅素食餐廳，唔止有多國菜嘅款式，仲引入埋以多種植物為本嘅食材結合而成「新豬肉」Omnipork，加入各種菜式入面，好似餃子呀擔擔麵呀都有！

新豬肉膽膽麵個賣相係吸引嘅，奶白色湯底中滲有一點點紅辣油嘅顏色，仲有一大球新豬肉。湯底係自家配方嘅豆乳湯底，再配上麻醬、辣醬，而新豬肉食得出有好香嘅菇味，微微辣度，都的確係有啲四川風味。

純素版嘅日本拉麵又好似真係比較少見，難得呢度有。白龍拉麵同樣都係用上豆乳湯底，可選配白麵豉，味道比想像中濃郁。

新豬肉仲可以當豬肉咁用，加入各種菜式當中，就連整餃子都冇難度。良豚煎餃無論係外形定係味道，都同出面嘅真‧豬肉餃好鬼似，仲真係有「肉汁」㗎，玩blind test都未必分得出兩者嘅分別。

 改邪歸正西多士

想飲返杯嘅，仲有Mojito嘅無酒精版！叫做Cojito。呢杯Lemon Ginger係用冷壓椰子水調製，再有啲檸檬汁呀薑呀咁，小清新，夏天飲好啱。

值得提一提嘅係，呢度有set兒童餐，啲肉醬意粉都係用新豬肉整㗎，Mac and cheese就係長通粉配甘荀茸、薯仔等等。唔止有得食，仲有得玩，有個玩具廚房仔，有未來漢堡砌下，又有食物卡仔睇下咁，有助培養小朋友素食嘅概念呀~

Kind Kitchen by Green Common
地址：中環德輔道中173號Nan Fung Place 1樓1號舖

文、相：Kar