銅鑼灣呢間人氣日式丼飯最近就喺同區選址重開，比起舊店新店闊落好多，除咗供應招牌人氣丼飯外，新店亦都加入多款新菜式，鍾意食日本菜嘅朋友要嚟試吓佢！

新菜式包括五款丼飯及一款壽司，而且有三款都係熟食，平時怕食生嘢嘅朋友都無問題！

九鼎丼($368)

九鼎丼淨係睇個樣都夠吸睛！木盤上放上 9 個小杯，每個小杯都係迷你刺身丼飯，並由廚師根據是日魚鮮發辦，固定刺身有日本海膽、大拖羅等，時令刺身就有油甘魚、三文魚子、赤蝦、活北海道帆立貝等，款式會因季節而有變化～每日限量發售，想食要趁早！

廚師發辦壽司($328)

鐘意食壽司嘅朋友都可以試呢個壽司omakase，固定壽司款式有大拖羅、海膽、穴子、紋甲魷魚、三文魚腩、真鯛、 縞鰺、赤蝦、油甘魚腩等，同樣會跟時令而有變～

蒜頭醬油漬魚生丼($178)

蒜頭醬油漬魚生丼有成 10 款時令魚生，如三文魚、大拖羅、油甘魚、深海池魚、劍魚、馬刀貝、紋甲魷魚等，用秘製蒜頭醬油醃漬而成。靠蒜頭醬油嘅濃味帶出刺身鮮甜，夠晒惹味。

鵝肝丼($188)

煎香後嘅鵝肝肥厚、甘香，質感幼滑。北海道帶子都大大隻又入味，配埋蘆筍、冬菇、日本流心蛋一齊食，一定好滿足～

塩燒魚鮫丼($228)

鹽燒魚鮫骨少肉多，而且嫩滑肥美。餐廳將鹽燒三文魚及油甘魚魚鮫加入丼飯中，魚油滲晒入魚肉同米飯內，送飯一流啊。

天丼($198)

講到日本丼又點少得天婦羅飯。有時令虎蝦、蘆筍、冬菇、大葉、及日本流心蛋，加入自家製醬汁中和油膩感，食晒成碗都無問題。

三つの国雲丹丼($298)

另外都唔可以錯過一系列招牌菜式，雲丹丼即係海膽丼，一碗食齊原板韓國海膽、濃郁甘甜嘅日本海膽同肥美嘅加拿大海膽，海膽控一定不可錯過！

北海蟹丼($198) 

有齊松葉蟹肉、松葉蟹腳、松葉蟹鉗、味噌蟹羔及蟹籽，松葉蟹鮮味十足。

吞拿魚丼($298)

呢個吞拿魚丼都係另一人氣之選，吞拿魚肉質肥美、彈牙又有咬口；吞拿魚腩充滿油脂，夠晒香～ 加埋碎蔥吞拿魚腩，啖啖都係吞拿魚啊！

二重鰻丼($198)

用醬汁將原條鰻魚及星鰻燒至入味，同樣亦有陣陣焦香。魚肉軟嫩多汁，一啖飯加上一啖鰻魚簡直係最高享受。

豊勝手丼

地址: 銅鑼灣登龍街18號V Point 地下3號舖

文、相、片: Yanica