近幾年，多間日本人氣拉麵進駐香港，有主打蝦湯底嘅，有主打雞白湯嘅，今次呢間就主打柚子拉麵，夠晒清新。

2001年喺日本神奈川縣開設首店嘅Afuri，人氣一直高企，喺日本成日都要排長龍。繼美國、葡萄牙、新加坡等國都開咗海外分店後，而家終於要嚟到香港喇！新店選址尖沙咀嘅一間時裝店內，提供拉麵、沾麵、小食、丼飯同埋酒類飲品為主，後日開始正式營業！

 柚子鹽味拉麵

拉麵控一定會知道佢哋最出名嘅就係柚子系列嘅拉麵，秘製雞骨湯底配搭柚子汁，以慢火同低溫熬煮，令精華不易流失，味道鮮甜中又帶有柚子微酸嘅清香。招牌柚子鹽味拉麵，配一塊火炙過嘅西班牙栗飼豚叉燒，仲有半隻溏心蛋，香口惹味。自家製嘅麥麵麵質柔軟彈牙。

 柚子醬油拉麵

柚子醬油拉麵同樣以雞骨湯底做base，加入醬油後，味道比鹽味拉麵較濃，不過感覺亦較為油咗少少。

 柚子甘露沾麵

柚子甘露沾麵都幾推介，醬汁以醬油做基底，加入柚子、芝麻、蔥花、辣椒等配料，鹹鹹地之後又覺得酸酸地，最後又有啲啲辣，層次豐富。而呢個沾麵同坊間嗰啲最大嘅分別，係呢個凍食嘅！醬汁係凍嘅，麵條亦可以揀冷嘅，口感清爽。

 炸軟殻蟹包

炸軟殻蟹包以刈包夾住炸到脆卜卜嘅軟殻蟹同幾片青瓜，再淋上自家製蛋黃醬，咬中醬汁嘅位仲會突然有陣辣香滲出。

 唐揚炸雞

另一樣炸物唐揚炸雞亦好吸引，一碟5件，炸粉薄薄的，入面嘅雞肉依然嫩滑。

 自家製煎餃子

充滿驚喜嘅自家製煎餃子，菜、肉餡料內仲加入咗清酒製作，難怪食落有淡淡嘅酒香。

餐廳亦有多款酒品選擇，清酒、啤酒、紅白酒等都有，cocktails就特別推介以下兩款。

 (左) Yuzu、(右) Endomame

柚子 （Yuzu），以rum酒、青檸汁、柚子汁、蜜糖等調成嘅柚子，貫徹返柚子嘅主題，酸甜清新；而比較特別嘅係枝豆（Endomame），先放入幾片薄荷葉，再倒入同枝豆一齊浸過嘅vodka同蛋白，飲落又真係有啲豆香喎。

阿夫利拉麵
地址：尖沙咀彌敦道100號THE ONE2樓 i.t orange forest
開業日期：1月15日

文：Kar
相、片：Tom Li