蟹迷最鍾意一定係秋天，一系列嘅蟹都係最靚最當造時期！日本除咗北海道鱈場蟹、毛蟹之外，其實福井盛產嘅越前蟹都好出名架。丼丼屋今次再度引入「日本丼物選手權」嘅人氣丼物，係來自福井縣蟹料理專門店「滝の川」嘅福井蟹丼呀！
「日本丼物選手權」係富士電視台、文化放送及東京巨蛋主辦嘅「東京故鄉祭」活動其中一部分，集合全國最人氣嘅丼物料理，入場人士可以逐一比拼試味，投選最美味嘅丼物。喺福井縣開業40年嘅「滝の川」，憑招牌福井蟹丼參賽，去年首次亮相就勇奪第5名，一日賣超過3,800碗！今次係第一次衝出日本於海外發售，做法一模一樣，原汁原味抵港。
有絕品！福井蟹丼($208，定食$228)同福井蟹丼($178，定食$198)兩款，主角係福井紅楚蟹，呢種蟹係深海品種，以11、12月最為當造，每隻蟹大約重700至800克，拆好嘅蟹肉由當地直送至香港。蟹丼用上成碗蟹肉，而且有兩隻蟹份量嘅蟹味噌，蟹肉清爽結實，味道鮮甜唔會過鹹，加埋蟹味噌已經好甘香鮮味，絕品版本仲有埋馬糞海膽同三文魚子，好豪華！
越前當地唔少餐廳都會推出蟹丼，「滝の川」社長荒矢純一先生話，佢哋嘅蟹丼特別之處，係配上用兩款醬油、日本最頂級昆布、木魚汁、味醂等自家調製嘅醬汁，味道剛好唔會搶走蟹鮮味，而且白飯微暖同蟹肉最夾。食法係先將醬汁打圈淋喺蟹肉邊，第一啖先食蟹肉加飯感受本身味道，之後先至再加蟹味噌一齊食，最後再加海膽同三文魚子，鮮味好澎湃！明明好大碗，但唔經唔覺就清晒！
定食包埋沙律、蟹小缽同麵豉湯，加咗醋嘅蟹肉酸甜開胃。
採訪當日和泉素行SOKO都在場，仲大讚蟹丼好好味！不過想食都冇咁易，兩款福井蟹丼每日只得20份，干日5:30pm供應，星期六、日及公眾假期於11:30-2:30pm及5:30pm後供應。暫時只做3個月，只限以下4間指分店有售。
丼丼屋食堂
文、相、片：Perrins