食肉獸召集！中環有間開咗一個月左右嘅日本過江龍，和牛漢堡店，啲和牛全部都嚟自宮崎同鹿兒島，burger嘅醬汁仲好多都係佢哋自家調製，例如，改良版嘅demi-glace咁，係出面食唔到嘅味道嚟。

兩款特色漢堡介紹返先：

龍馬漢堡係佢哋喺高知縣店最受歡迎嘅burger，啲料多到一個點：和牛漢堡扒、吞拿魚碎、炒蛋、青椒、茄子、番茄、野菜、芝士等等，淋埋上面講嘅Demi-glace醬、特製番茄醬同蛋黃醬。疊埋一齊個burger勁高囉，擘到個口最大都應該一啖咬唔晒！堅係足料啊，有成120g咁重㗎！

而5019 BLT漢堡用嘅醬料都係一樣，但係配料就唔同喇，和牛製作嘅漢堡扒，再加煙肉、洋葱、煎蛋、番茄、生菜、酸瓜嘅配搭，應該都幾fresh。

兩款漢堡嘅菜、肉比例，同外邊食開嘅漢堡有啲唔同，呢度菜佔嘅份量都幾多下。至於塊漢堡扒，就係日本入口嘅和牛，再切碎變免治牛堡。食落牛味唔太突出，不過夾埋甜甜地嘅自家調製Demi-glace醬又唔錯。而麵包亦相對鬆軟，面頭輕輕烘過下就硬脆少少。

至於食量細少少嘅朋友，都有返啲80g重嘅款式揀嘅。其中，辛辣烤雞漢堡就係香港特有嘅款式，雞肉配上水牛城汁去炸過下，辣得嚟唔係死辣，幾香，但又有啲刺激咁，襯返啲菜食就可以中和返。

除咗漢堡之外，餐廳仲有其他嘢食嘅，好似Loco Moco和牛漢堡飯、特色雞翼、沙律之類。

飲品有芒果沙冰、士多啤梨沙冰之類，啱晒開始熱嘅天氣。望一望餐牌，有款沙冰幾特別，叫「健康波菜沙冰」，係真係溝埋菠菜落去榨汁㗎。成杯整出嚟青bb咁嘅色，但唔使驚，菜青味唔重，淡淡嘅菠菜味之中仲有些微甜嘅感覺，因為製作過程加埋芒果同香蕉落去呀。

5019 PREMIUM FACTORY
地址：中環蘇豪嘉咸街46號地下

文、相、片：Kar