旺角中心自從轉營後有好多平民美食小店進駐，最新開業嘅有呢間──少女風立食甜品店，有小紅鶴水泡沙冰、玫瑰花形雪糕等搶眼小食，當中最特別嘅有芫茜梳乎厘！咁特別？即刻睇相先！

1.　玫瑰雪糕雞蛋仔($35)

舖頭最好賣嘅No.1 item，有新鮮即烘嘅雞蛋仔放底、加入士多啤梨、士多啤梨味雪糕、士多啤梨醬及花生脆脆。最吸引嘅係，上層會擺放一件玫瑰花形牛奶味雪糕，又靚又eye-catching，成功吸引到一班少女瘋買！而且雪糕味道、水果都可以由客人自選架，好貼心。

2.　芫茜梳乎厘($35)

最令開飯仔好奇嘅係，就係呢個芫茜梳乎厘！店子先將芫茜蛋漿調配好，再加入芫茜粒，然後放入焗爐烘焗而成。梳乎厘質素都幾好，外層鬆軟，帶有微微焦脆，入面就好濕潤。另有黑椒、辣椒仔口味。

食到有粒粒芫茜，一來有多啲口感，二來越食得多，「茜」味越更濃郁。

3.　芒果雪花綿綿冰($35)

以芒果綿花冰做底，再加埋芒果、小丸子及甜忌廉而成。分量細細，但芒果、小丸子都好足料，好甜！

4.　OREO奶昔、士多啤梨奶昔($10/杯)

喺旺中開甜品店，廿幾款飲品、沙冰絕對唔少得，但當中最受客人歡迎嘅就係OREO奶昔，將OREO、牛奶等材料攪勻，再灑上OREO碎就完成。只係開業約一個星期，每日都賣出近50-60杯，人氣極高。後面係士多啤梨奶昔($10/杯)，上面灑滿士多啤梨脆片，好解渴。

枱面有個配料架，有朱古力針、彩針、棉花糖及朱古力脆脆，畀客人自行添加。

加$10蚊仲可以有個小紅鶴水泡添！

臨走前，記得喺舖頭翅膀位影張相呀！

Chuck Close Dessert
地址：旺角彌敦道688號旺角中心2樓SA 28A號舖

文：Joy