都未到盛夏，天氣已經咁熱，出街流晒大汗，每次都要買杯凍飲揸手先堅持到。珍珠奶茶同芝士奶蓋飲到悶悶地，有無其他好推介？梗係有！旺角呢間甜品飲品外賣店主打糰子、雪糕、寒天同芋圓，由紅豆湯到冰涼凍飲都有。店舖所用嘅材料例如抹茶、焙茶雪糕、白玉、寒天、芋泥、紅豆湯等全部都係由自家工場製作，款款真材實料，確保味道品質保持最佳狀態。

抹茶歐蕾 $26

歐蕾即係以牛奶為主材料嘅飲品。呢款歐蕾除咗牛奶之外，仲會加入以牛奶製作嘅自家製雪糕同糰子，滿足又想飲嘢又想食甜品嘅你。抹茶歐蕾底部會先加入紅豆同小丸子，然後倒入鮮牛奶，加上自家製牛奶雪糕，最後淋上特濃抹茶醬。牛奶撞上紅豆後帶紅豆香甜，自家製雪糕口感帶冰感，奶味濃郁。而最後淋上嘅抹茶醬係飲品精髓所在，抹茶味超香濃，令雪糕同飲品味道更甘香。

黑糖歐蕾 $26

黑糖飲品絕對係近年熱門之選。同樣係以鮮牛奶沖製嘅黑糖歐蕾，先以嚟自台灣嘅黑糖塗滿杯內，再將牛奶撞入杯中，形成黑糖虎紋。面頭加上自家製黑糖雪糕，並淋上香甜黑糖蜜，成杯飲品都充滿黑糖香。值得一提嘅係，飲品加入自家製小黑玉代替珍珠，味道帶黑蜜香甜，而且口感比珍珠更軟糯更有咬口。

白玉抹茶 $26

呢碗甜品包括白玉、紅豆、抹茶凍同抹茶雪糕。店鋪主打嘅白玉大大粒，口感煙韌有咬口，自帶微甜；紅豆都係自家煲製，粒粒分明；而自家工場製作嘅抹茶凍比較少見，抹茶味甘香，口感清爽。

寒天焙茶 $28

寒天焙茶主角牛乳寒天牛奶味香甜，即使混合咗其他配料，奶味仍然好出，而且口感軟滑得嚟唔易碎，唔會食食下變咗豆腐花咁。另外，一大球芋泥都係自家製作，以新鮮芋頭加糖壓成，綿密帶微微甜香。焙茶雪糕茶味香濃，同牛乳寒天好夾，加埋旁邊嘅小芋圓同小丸子，令甜品口感更富層次。

特盛小豆湯 $25

紅豆湯貼心地有凍熱選擇，入面仲有齊小丸子、小芋圓、白玉同栗子，簡直係煙韌雜燴。紅豆湯係自家煲製，紅豆保持粒狀，並無煮至稀爛。而小芋圓係一粒粒珍珠狀芋圓粒，個樣幾可愛，但就無正統芋圓咁有咬口。不過店鋪嘅芋圓同地瓜圓都係嚟自台灣，微甜帶芋香同地瓜味，而且好煙韌，鍾意口感豐富啲嘅朋友可以選擇有正統芋圓嘅甜品。

糰子專賣店
地址：旺角金雞廣場地下8號鋪

文、相、片：Kenna