好多人都好想食一次「廚師發辦」，不過又成日因為價錢問題而卻步。其實Omakase都唔一定貴嘅，旺角呢間鮨店就有親民價版，幾百蚊就可以食到五道菜連清酒嘅omakase，冇晚巿堂食啫，仲有lunch嘛，午巿有八折添呀！

佢哋嘅食材全部由日本空運到港，各款刺身更係由日本豐州魚市場每日新鮮直送，夠晒新鮮。五道菜Omakase包括一款季節前菜、五款刺身、兩款天婦羅、五款壽司同湯品、再包埋清酒（或無酒精飲品）同季節限定嘅生果添。不過因為每日返貨未必一樣，每次去食都可能會有小驚喜呢。

北海道鱈魚白子係日本冬天嘅時令菜式，鱈魚白子本身口感已經好creamy，入口即溶，師傅仲特別伴以柚子酸汁，酸酸咪咪咁更清新。

5款刺身都相當新鮮，並利用醬油、鹽醃或者火炙等技巧去提鮮、豐富原有嘅味道。識食一定係由最淡味嘅食起，最後先食最濃味，慢慢嗒真每款刺身嘅鮮香。開飯仔去採訪當日就有以下呢5種刺身：配上酸汁啫喱同香蔥嘅羽太，味道較淡，略有嚼勁；鹿兒島深海池魚肉質肥美，爽口有彈性，仲有啖啖油香，加埋柚子胡椒芝麻作提味；跟住就到粒粒爽口鮮甜嘅北海道粒貝，師傅巧妙地加入柚子皮，突出佢嘅清甜；北海道牡丹蝦配蝦膏嘅蝦肉本身都爽甜，加埋甘甜嘅蝦膏係會令人食到想再encore；最後嘅係高知縣藍鯺吞拿魚，油香滿滿，入口溶化。

兩款天婦羅分別係三蟹卷同蝦卷，前者一啖可以食到蟹肉、蟹籽同蟹膏啊，驚唔驚喜？意唔意外？炸漿薄薄一層，咁就可以更專心咁食呢幾樣嘅配搭，香、甘、甜、爽、脆、鮮，層次相當豐富，令到隔籬嘅蝦卷即時失色了。

茶壺清湯亦有水準，係黑松露野菌茶壺清湯呢，打開壺蓋就會發現入面相當足料。選用本菇、八靈芝菇、黑松露等熬製，建議先飲一啖原味，松露味立馬湧出，夠晒突出，但可能有啲朋友會覺得太濃太搶味嘅話，就加少少青檸汁中和一下，雖然松露嘅後勁依然可以保持到，但清甜嘅菇味同時都會出返嚟啦。

食埋5款壽司就啱啱好，同樣建議由淡食到濃，呢日有左口魚、金鱔魚、金目鱲魚、秋刀魚同北海道馬糞海膽壽司。

飲埋餐廳推介嘅京姫 匠 純米大吟釀就圓滿喇，呢隻分別喺18、19年都獲得日本金賞嘅sake，採用山田錦酒米以45%精米步合釀造，入口清甜，後尾辛辣回甘。

鮨之  
地址：旺角亞皆老街8號朗豪坊4樓6號舖

文、相、片：Kar