聖誕未到但味蕾可以先品嘗佳節味道！呢間連鎖咖啡店每年聖誕都會推出節日限定飲品同食品，不過今年最受觸目嘅，應該就要數到之前韓日台都出過，而聽日正式登陸香港分店嘅迷你布甸杯！想試邊款口味？不如先睇睇開飯仔實試報告再決定！
 

星巴克咖啡將於聽日(8/11)聖誕限定飲品同食品，當中迷你布甸杯係香港首度登場！白色杯係焦糖雲呢拿布甸，打開會見到香甜焦糖醬，而布甸裡面仲見到一粒粒黑色嘅雲呢拿籽。食落有淡淡雲呢拿味，焦糖味比較突出，甜度適中而且布甸口感綿密，做飯後甜品最啱。
 

而黑色杯就係朱古力布甸，主要材料有黑朱古力加忌廉，可可香味明顯，朱古力味道超濃郁，而且口感比焦糖雲呢拿布甸嘅更Creamy。所以唔好睇個迷你布甸杯細細杯咁，食完一個都真係幾飽下，朱古力控必試！
 

食完布甸個杯記得洗乾淨，可以喺11月22號開始買埋星巴克種植套裝，裡面有齊種植器、種子、培植土等，可以用布甸杯種植芝麻菜或苜蓿。重用個杯環保啲，種出嚟嘅迷你菜可以當沙律菜享用，加上種植套裝所得收益扣除成本後會全數撥捐社企雲耕一族繼續支持其本地環保推廣工作，一舉三得呀。
 

而今年聖誕限定飲品就有四款口味，包括之前大受歡迎嘅拖肥果仁脆趣鮮奶咖啡、薑汁鮮奶咖啡同聖誕薄荷朱古力咖啡三款飲品再次推出。而且同時供應熱飲、凍飲同星冰樂。
 

唔飲咖啡嘅朋友仔，仲有全新登場蘋果肉桂樂悅茶！糅合紅茶、烏龍茶同茉莉花茶嘅茶香，再加蘋果汁同頂層嘅肉桂香料泡沫。不過想試嘅朋友仔要留意，蘋果肉桂樂悅茶只限呢三間分店供應：銅鑼灣利園、中環蘭桂坊及尖沙咀太子集團中心。有熱飲同凍飲選擇。
 

食品方面有五款選擇，三重芝士煙肉三文治用咗車打芝士、莫薩里拉芝士同惹味芝士醬配煙肉再烘至香脆。而暖心抹茶蛋榚就有吸引軟心效果，食到抹茶味不過略嫌甜味較重，蓋過抹茶獨特甘味。但配埋酸酸甜甜嘅醬同紅莓食就啱啱好。
 

另外仲有加入嫩滑炒蛋嘅環保吞拿魚蛋烤卷，色彩繽紛味道清新嘅香烤彩虹田園蔬菜沙律，同材料豐富嘅奇亞籽紅桑子椰奶芭菲。
 

最後提埋你，同時仲有聖誕系列商品、星巴克卡、聖誕綜合咖啡豆同聖誕樂悅茶等登場，陪住你倒數聖誕！

文、相、片：Cathy