當季水果加上期間限定已經好吸引，今次介紹嘅主角仲係嚟自日本熊本縣嘅新品種士多啤梨！灣仔呢間日式鮮果撻專門店推出春季限定，啱哂情人節嘅原個心型士多啤梨芒果撻，亦有可以散買件裝嘅士多啤梨撻。無論係慶祝生日、白色情人節，甚至係獎勵一下自私食都得，嘻嘻。
 

Sweet Heart Tart（$580）

PdP Pies & Tarts即日起推出選用日本熊本縣恋みのり士多啤梨嘅兩款果撻，最搶眼嘅當然係呢款Sweet Heart，唔單止係心形，圍邊嘅士多啤梨又係愛心錐形，中間嘅芒果仲要砌到成朵玫瑰花咁，保證女神見到會立刻心花怒放！呢款恋みのり士多啤梨係2017年春天推出嘅新品種，味道酸甜清新，更帶少少花香。
 

芒果就選用菲律賓嘅呂宋芒，果肉多汁香甜。鮮果下面係幼滑忌廉、海綿蛋糕、吉士同曲奇撻底，口感同味道層次都相當豐富。份量其實都唔算細，除咗慶祝情人節或者白色情人節之外，其實姊妹聚會，甚至係開新年Party三五知己分享都夠食。
 

Kumamoto Koiminori Strawberry（切餅$68/件）

搵唔到人Share都唔緊要，熊本縣士多啤梨系列仲有呢款士多啤梨撻，舖滿粒粒色澤紅潤飽滿嘅恋みのり士多啤梨，同樣吸引！酸甜平衡嘅士多啤梨同富牛奶香嘅忌廉非常夾，下面仲有蛋糕、吉士同酥脆嘅撻底。
 

 

Kumamoto Koiminori Strawberry（原個$680）

果撻有件裝同原個，原個即係10件裝大細。注意返兩款果撻預計供應至3月底，視乎日本當地供應期。原個果撻需要兩日前上網或親身到店預訂。
 

Hojicha Latte（熱）（$48）

嚟分店享用嘅話，唔好錯過因應今年豬年而製作嘅可愛豬仔拉花！開飯仔就揀咗焙茶牛奶，口感柔順，烘焙香味當中不失綠茶嘅清幽味道，甜度適中。除咗焙茶牛奶，亦可以選擇抹茶、奶茶等。
 

PdP Pies & Tarts
地址：灣仔皇后大道東200號利東街地下G06及 F06A號舖
*熊本縣士多啤梨供應期有限，原個果撻需2日前上網（www.pdppiesandtarts.com）或到店預訂

文、相、片：Cathy