西營盤最近開咗間藍色為主嘅Cafe，打開Menu見到好細心咁標示晒生酮、全素或者無麩質，原來係堅尼地城一間同樣主打無麩質素食咖啡店嘅新Line。新店會有更多適合生酮飲食嘅選擇，從飲品、主菜到蛋糕都齊晒！
 

Infiniti C By October位於港鐵西營盤站附近，係堅尼地城以粉藍色Earl Grey Cream Cake「洗版」Infiniti C嘅新店。裝修以藍色為主，主菜同蛋糕亦有更多選擇，對於進行生酮飲食（Ketogenic Diet）嘅朋友嚟講，最開心嘅係呢度有唔少專為生酮飲食設計嘅菜式！
 

Broccoli Crust Pizza（$102，可選擇素芝士）

進行生酮飲食要戒澱粉，同時又可以食Pizza？因為呢個Pizza係用西蘭花做批底！上面再加芝士、大啡菇同食用花。開飯仔呢個係轉為素食芝士嘅版本，素食芝士加咗少少椰奶所以食落有椰子香同菇菌香。

西蘭花批底當然無一般Pizza批底咁實咁脆，不過勝在完全無草青味，就算平時唔鍾意食菜嘅朋友仔亦可以一試。而適合生酮飲食嘅另有Spinach Veg Roll（$88）、Avocado Cheese Omelette（$82）等選擇。
 

Keto Matcha Cheesy（$58）

飲品亦有生酮選擇，平時要戒糖可能唔係飲防彈咖啡（Bulletproof Coffee）就係咩都唔加嘅茶或齋啡，嚟到呢度就可以飲奶蓋抹茶啦！低糖奶蓋主要用忌廉同Cream Cheese製作，比坊間嘅奶蓋更厚滑。建議先分開試咗奶蓋同抹茶嘅原味，再搞勻一齊飲。唯一扣分嘅係抹茶味道略苦，缺少回甘。
 

Chicken Mole Tacos（$98）

新店限定菜式之一，將各款食材分開奉上，色彩繽紛得嚟又方便大家按喜好DIY自己口味嘅Taco。白色嘅係Dairy Free乳酪，所以有乳糖不耐嘅朋友都食得。粟米片亦非常香脆，就咁配蔬菜同醬就已經好好食，再加香料味十足嘅Mole醬雞肉就更豐富！
 

Skillet Kale & Pumpkin Spaghetti（$88，加日本雞蛋+$10）

呢度亦有三碟新出嘅素食意粉，彈牙長意粉加上微甜嘅南瓜汁呢個配搭本來已經非常討好。上面嘅羽衣甘藍煎得夠脆夠乾身，香口而無草青味更加係一大加分位。如果係食蛋奶素嘅朋友亦可以好似開飯仔咁加多個半熟雞蛋，令醬汁更香口。
 

Vegan Sesame Cake（$62）

店家招牌蛋糕系列當然亦繼續供應，有Vegan同Keto等唔同選擇，呢款芝麻蛋糕就係用椰漿代替蛋奶嘅全素蛋糕。坊間一般無蛋奶嘅全素蛋糕都比較乾身，呢度嘅就保持到口感濕潤。忌廉混入椰絲口感豐富，蛋糕嘅芝麻香就比較突出，甜度適中。
 

Infiniti C By October
地址：西環西邊街38號明德山地下A店

文、相、片：Cathy