暑假節目夠晒豐富，書展、動漫節同埋美食博覽密鑼緊鼓，各位準備日日去灣仔啦！好彩呢區出名多好嘢食，更不時都有新餐廳開，今年行完書展去邊度開餐試食嘢好？開飯仔為你推介幾間新店，即刻睇睇先！
大阪過江龍 神虎麵商店
灣仔有唔少拉麵店，呢間神虎開業4年一向都好人氣，後來轉手結業再捲土重來。主打係熬製8小時嘅濃郁豚骨湯底，加入背脂同神虎汁製成，有最基本嘅元虎，亦有招牌神虎、黑蒜油黑虎、辣味赤虎以及蝦味噌海老虎。溏心蛋都做得出色，醫肚食拉麵最滿足。
圖：日系咖啡店 Kohee
睇書睇到眼瞓？飲杯咖啡提提神先！呢間位於酒店入面嘅咖啡店，由曾任日本Blue Bottle Coffee任顧問的日籍咖啡達人監督出品。咖啡豆用日本烘焙空運來港，以炭燒深焙為主，連黑糖都係日本貨，必試手工咖啡。唯一缺點係收5pm，早去先有得飲。
圖：藍屋社企糖水 時間關係
因為時間關係，帶大家嚟度灣仔歷史地標藍屋，呢間手工糖水店係社企，選用本地有機食材製作，招牌有桃膠雪耳甜菊葉糖水、薏米腐竹白果雞蛋糖水、蓮子百合陳皮紅豆沙等，款式唔算多，勝在足料而且實而不華，甜甜哋即刻有energy。
圖：自家製刀削麵 拾味山西刀削麵館
行到咁攰，削碗麵俾你食吖？呢間山西刀削麵館麵條係自家製作，由搓麵條至削麵一手包辦，即削即煮。麵質煙韌，配埋上湯立即補充體力！熱辣辣唔想食湯麵？亦有熱拌麵、冷麵、醉雞同雲吞等小食。價錢親民，買完書破產後恩物。
圖：文：Perrins