連續幾日介紹咗曼谷米芝蓮星級餐廳，今次睇返平民美食先！唔好以為香港先有燒肉，泰國都有得食架！為咗拜訪呢間被譽為曼谷最脆豬肉嘅食店Mr Joe，同時奪得車胎人推介同街頭美食推介。位置唔太就腳，一定要專登搭的士去，店面好唔起眼，不過見到開放式廚房有兩位師傅密密斬燒肉，就知冇去錯地方！
燒肉大大件，由女師傅摩打手斬成長條型，大小均勻，而且每一吓都聽到清脆嘅「嚓嚓」聲，橙色豬皮有荔枝皮效果，都幾厚身，加上層層相間脂肪同瘦肉，睇見都流口水呀。一份只係55 Baht，$13咋！
食落豬皮脆過薯片，卜卜聲超香口，但唔會過硬，真係會食唔停！雖然用新鮮豬肉，但本身味淡，唔似港式會經過醃製，所以點埋甜豉油一齊食就啱啱好喇。記得一定要散叫一碟，因為浸咗落湯豬皮淋晒，冇晒脆卜卜嘅質感。
舖頭另一招牌菜係粿汁，粿汁係用米漿煮成嘅粉條，有啲似粗厚而短身嘅河粉。湯底用豬雜同胡椒煮成，微辣惹味，加埋豬肺、豬腸、豬腰、豬皮等內臟，豬味好濃，食得出新鮮，但唔太食內臟嘅可能會覺得羶。一碗60 Baht，好抵食！
雖然舖頭都幾大，但午市係座無虛席架，避開繁忙時間就唔使等位。店名有唔同譯音，好似Kuay Jup Mr Jo、Kway Chap、Guay Jab等，總之跟住地址去咗冇錯。
Mr Joe Guay Jub (Mr Joe Crispy Pork)
地址：Soi Chan 44, Chan Road, Bangkholaem, Bangkok, Wat Phraya Krai
更多曼谷米芝蓮推介：
文、相、片：Perrins