忙到死又要抖下，得閒到喊就更加要搵下嘢做，3點3，食個tea呢支歌仔，幾時都啱唱嘅。最新4間餐廳嘅下午茶介紹返，有盛夏鮮果，有美肌蜂蜜，仲有重口味榴槤。
呢間喺銅鑼灣商場入面嘅米芝蓮星級法國餐廳，環境固之然靚，以夏日森林鮮果做主題嘅下午茶同樣精緻。
三層架總共有5款鹹食，其中最吸引嘅就係松露龍蝦配蛋黃醬，成大片松露㗎份量好足，龍蝦肉結實而鮮甜，一啖放晒入口係幸福嘅。
而成大個木箱裝住嘅甜品就更加一眾女生們嘅重點，個盒好靚，舖咗「草地」同野餐格仔布，啲甜品的的式式又造型精美。插住嘅白朱古力棒棒糖，原來係中間係成嚿菠蘿嚟。西瓜樣嘅馬卡龍，食落就發現係士多啤梨味嚟，唔算太甜而杏仁味香，唔錯。啫喱係檸檬茶加蘆薈。
側邊兩粒炸黑朱古力冬甩要小心食呀，咬開都幾多朱古力醬，dark dark地。不得不提嘅係兩款鬆餅，原味同提子味，夠晒鬆軟，牛油味亦非常香濃。成個tea set份量都唔少晏，建議真係有心食嘅，前一餐lunch就唔好食太多嘢喇。
供應時間：
平日：3:00 – 5:30pm
星期六、公眾假期：3:30 – 5:30pm
價錢：HK$268（一人份）、HK$518（二人份）
美肌蜂蜜 廷廊
尖沙咀有酒店就同護膚品牌合作，推出咗個蜂皇精華蜜下午茶，各款嘢食都加入香港有機場嘅蜂蜜，包括龍眼蜜、荔枝蜜同常春藤蜜等。上架仲係用特製蜂巢形點心架添，由視覺到味覺都甜到入心。
本身已經甜嘅馬卡龍，加埋黑朱古力同蜂蜜，就更加啱晒甜魔喇。至於朱古力迷嘅最愛，應該就係用薈萃鹹焦糖、蜜糖朱古力、牛奶朱古力製嘅迷你餡餅嘞。另外仲有用伯爵茶奶油、蜂蜜、香橙啫喱層層疊整嘅Honeycomb。唔止甜嘢呀，鹹食都加蜂蜜。好似薰衣草蜂蜜烤鴨胸配青瓜及車打芝士三文治咁。
供應日期：即日起 至 9月30日（逢星期四到日）
價錢：$348（一位價）、$598（兩位價）
備註：同場加送法國嬌蘭Abeille Royale殿級蜂皇系列禮品套裝及專業護理服務，如眼霜等
泰式鮮果 Amazing
泰式下午茶都有介紹，仲係自助餐嚟添，無論鹹甜嘅嘢食，都加入生果嘅元素，好似炭燒豬頸肉荔枝金不換米紙卷、荔枝肉碎生菜包、青木瓜田園沙律等，夏天食夠晒爽。甜品方面，有雪糕雞蛋仔！自助餐食雞蛋仔？可以試下呀，新味嚟呀，阿華田雞蛋仔喎，仲可以自己加雪糕同toppings。鍾意食榴槤嘅就有榴槤冰皮卷揀。
供應日期：即日起至8月27日（逢星期六、日及公眾假期）
供應時間：下午3時至5時
價錢：$188（成人）、$128（小童）
榴槤飄香 The Market
最後壓軸介紹嘅就係果王榴槤！尖沙咀呢間酒店即將推出榴槤甜品下午茶，特別揀咗馬來西亞嘅新鮮榴槤，製成唔同甜品。當中最吸引嘅係榴槤炸彈，外表睇落好似無乜特別，但咬落外皮香脆煙韌，裡面嘅榴槤蓉非常香濃。
而賣相精緻嘅D24閃電泡芙同層次分明嘅斑蘭榴槤千層都非常考功夫，特別係千層蛋糕製作方法有啲似日式嘅年輪蛋糕，需要逐層烤焗。
下午茶Set仲有檳城白咖啡榴槤卷、榴槤焦糖布甸同精選馬來西亞榴槤肉。全部榴槤都由馬來西亞每日空運到港，保證新鮮。
供應日期：8月7日至8月18日（逢星期一至五）
供應時間：3:15 - 5:15pm
價錢：$298（兩位起，預先付全額費用可享折扣優惠）
文︰Kar、Cathy
