平實好味熱狗餐 德國熱狗
圖：Barbie 芭比
小店當初真係由德國人創立，經過兩次轉手之後依然保存德國風味。嚟呢度最抵食嘅一定係超值套餐，先揀熱狗腸，由大路嘅脆皮煙肉火腿腸、有得拉芝嘅細芝士腸+車打芝士、再到少見啲嘅脆皮咖喱雞肉腸任揀！揀埋醬汁用烘過嘅麵包夾好就係飽肚熱狗一份。套餐包埋飲品，同薯條或薯餅或配料，即係話要香脆薯餅得，喺熱狗上面再加車打芝士亦得，得咗。
鮮甜石鍋魚湯烏冬 鳴門魚湯麵亭
圖：jcxjessie，安妮是隻小肥豬
雖然呢間日本菜會貴少少，但勝在夠真材實料，而且唔係度度都食到。招牌菜係石鍋招牌鮟康魚湯烏冬，熱辣辣石鍋裡面係奶白色嘅鮟康魚湯，有鮮味而清甜，最重要係飲完成碗都唔會口渴。烏冬亦相當煙韌，稍嫌糖心蛋嘅蛋黃唔夠流心。另外北海道牛油蟹棒烏冬同石鍋芝士焗豬軟骨飯亦係推介。最後溫馨提示，午市套餐會比較抵食，可以考慮Lunch嚟開餐。
懷舊港式快餐店 天馬快餐
圖：X962，green13
講起港式漢堡，可能唔少人第一時間會諗起紅磡嘅時新快餐店，不過何文田呢間快餐店就係附近居民同學生嘅集體回憶。近年嘅招牌一定係少年食神 Michael 推介過嘅米高漢堡，芝麻漢堡包烘至脆身，再夾Juicy又肉味濃郁嘅手打漢堡扒、煎蛋、番茄、洋蔥、生菜絲，加埋粗身嘅波浪薯條同汽水，就係好似穿梭返去八十年代嘅港式快餐。
家庭式韓食小店 sweet'spice
圖：kristiffany，FOODPRINT
其實韓國菜除咗炸雞、燒肉同人參雞之外，仲有唔少選擇嘅。呢間由真·韓國人主理嘅食堂就賣家庭式韓食，泡菜豬肉飯足料大份，泡菜辣度啱啱好而且豬肉分量都唔少。辣牛肋肉飯就有加入大葱同生蒜嘅惹味燜牛肋肉，配自家制小菜同海帶湯，好似真係返咗屋企食飯咁。炸醫麵跟返韓國地道風味，黑鼆鼆嘅炸醬有肥美五花肉，撈埋滑溜麵條又一餐。
休閒嘆All-day Breakfast The Little Devil
圖：Jacqueline Au
放假瞓到自然醒是常識吧，好彩呢個世界有All-day Breakfast，令大家晏晝起身都仲有好味早餐嘆。呢間西餐廳嘅All-day Breakfast就係唔少區內為食友嘅首選，無論係有齊煎腸煙肉煎蛋嘅The Classical，水波蛋相當流心嘅Egg Benedict，食肉獸最愛嘅Steak and Eggs定有香脆炸魚嘅The Fishermen全部都有板有眼，加上環境舒適，偶然Hea一下啱哂。
柴犬店長駐守簡約Cafe Black Sugar Coffee & Lifestyle
圖：Parisjuly16，Queen_Angel
由一對喜愛咖啡文化嘅夫婦開設，店名嚟自佢地養嘅柴犬，佢偶然亦會嚟Cafe做店長。不過無論有無緣遇到柴犬店長都好，嚟呢度嘆杯手工咖啡同輕食都足以令你滿足。Avocado Egg Toast用健康牛油果搭配碎蛋沙律，連多士一齊食夠細食嘅女士當Light Meal。Lady D Rasberry Cake個名今次嚟自女店主，蛋糕扎實富牛油香，配酸酸甜甜嘅紅桑子甜而不膩。
學生最愛燴意粉 奇香冰室
圖：arshenry14，noel.ho.1297
利申，開飯仔都知道呢間冰室並唔係非常特別，但佢地嘅茄汁燴意粉又的確係唔少附近學生嘅最愛。無他嘅，一嚟廚師有心機，每條意粉都硬度適中又有酸酸地嘅茄汁包住；二嚟配料亦唔差，蛋牛嘅煎蛋係啱啱好嘅燶邊太陽蛋，牛肉亦算嫩滑有肉味。另外三絲通粉亦係街坊推介，三絲即係蛋絲火腿絲同雞絲，例牌茶餐廳味道不過夠飽肚。
隨時接收最新資訊
讚好OpenRice專頁！