香港貴為美食天堂，歐美日韓台等等各地嘅美食都匯集喺度，點可能冇西班牙Churros先得架？最近就有間正宗Churro專門店登陸尖沙咀啦~

根據嚟自美國南部嘅老闆講，正宗西班牙churros用料簡單，就只係得麵粉、水同鹽去製作，佢哋仲特地喺西班牙採購咗部機器返嚟，務求將最原始嘅churros帶畀香港人。

想試出真功夫，當然就要經典原味啦。每條churro都係即叫即製，炸起後再攤放一陣，散走多餘嘅油分之外，亦令churro變得更脆身，蘸埋肉桂砂糖就食得。Churro外脆內軟，口感唔錯，肉桂味較為淡咗少少，不過好就好在整體感覺都唔太甜。老闆話知道香港人唔喜歡太甜，所以調低咗糖度呀。

不過，淨係得單調嘅原味又點滿足得到貪靚又貪新鮮嘅朋友仔吖？佢哋仲有多款色彩繽紛嘅醬料同toppings，加上去變糖衣系列又得，連埋雪糕一齊上都仲得！

夏天總係會想食下椰子椰絲咁，Coconuts呢款就啱晒，焦糖牛奶醬配椰子絲及杏仁片，椰香滿滿。

抹茶控睇完menu多數都會揀Crunchy Matcha，炸香後搽上抹茶醬，再灑上彩虹糖碎，靚係幾靚嘅，不過抹茶味就唔算好濃郁。

夏天加配雪糕絕對理解，但雪糕暫時只係得雲呢嗱一種口味，不過配埋各種toppings同churros就有好多變化咯。好似ALOHA咁，加入芒果粒同熱情果醬，雪糕嘅奶香中，又有陣陣酸酸甜甜嘅味道。

Wonderland 嘅churros搽上鮮紅色嘅士多啤梨醬，特別sharp醒，粒粒新鮮士多啤梨仲有frozen嘅感覺，夠晒冰感。

另外舖頭亦有提供一系列鮮製Lemonades特飲，有啲仲會加埋蝶豆花落去，清新解渴得嚟仲好靚添。

Twist & Buckle
地址：尖沙咀漆咸道南29-31號溫莎大廈地舖

文、相、片：Kar