今個周日就係母親節，大家諗好帶媽媽去邊度食大餐慶祝未呢？仲未揀好餐廳嘅你好焦急？定啲嚟，不如望埋以下4間擁有唔同特色嘅餐廳推介，例如有滋補養顏大餐、養生湯底火鍋、精緻西式套餐等，話唔定有心水呢！
平時忙碌為我哋打點生活嘅母親勞苦功高，趁母親節送上一份心意，帶媽媽食翻個養顏花膠宴，有睇頭之餘夠晒滋補。花膠營養價值非常高，係養顏珍品，對關節痛都好有功效。呢度嘅花膠菜式非常多元化，母親節套餐包括黑魚籽濃汁扣花膠、松茸竹笙花膠螺頭燉雞、XO 醬翡翠炒日本帶子、同鮑汁花膠撈飯等。當中黑魚籽同花膠配搭新穎，濃湯花膠口感軟滑，膠質豐富；而松茸竹笙花膠螺頭燉雞湯汁清甜，材料亦豐富入味，係滋補好選擇。
其他推薦菜式仲有大啖肉無花菓極品叉燒、鮮甜又有驚喜嘅木藏牛同海龍皇砂鍋粥。無花菓極品叉燒外皮爽脆，肉質嫩滑，無花菓醬汁酸甜開胃；木藏牛即係釀入牛肉嘅木瓜，切開煮至軟腍嘅鮮甜木瓜，裡面就有味道香濃嘅燉牛肉。
母親節套餐
供應日期：5月12日
價錢：$3580（6位起）(另收加一服務費)
想要啲新意，不如帶媽咪穿越時空，品嘗清朝慈禧太后最愛嘅養生湯底火鍋，孝敬下屋企呢位「太后」啦！慈禧太后非常注重養生同美容，為保持容顏不老，會將新鮮摘取嘅菊花花瓣加入火鍋湯底食用，有助排毒、清熱同滋潤肌膚。限定供應嘅騰雲菊花五小鍋包括5款湯底，分別係藥膳菊花湯、黑松露雜菌湯、四川麻辣湯、養生藥饍湯同鮑魚雞粥，每款用料高貴，又有唔同功效。
套餐仲包括多款火鍋配料，如金豬報喜豬肉餃子、黑松露蝦蟹餃、鵝肝醬匈牙利鬈毛豬肉丸同菊花墨魚丸等，一家人食絕對溫馨又飽足。
騰雲菊花五小鍋
供應日期：即日起至5月31日
價錢：每位$468（4位起）
以下呢款母親節限定套餐好適合鍾意悠閒嘆茶嘅媽媽！套餐每道菜式都加入茶葉元素，頭盤係清爽嘅法式里昂沙律配綠捲鬚生菜，沙律包含以伯爵普洱茶入饌嘅酥脆煙肉，並伴上半熟水波鴨蛋，成為一道有淡淡茶香嘅精美菜式。
主菜方面有4個選擇，想尋找清新茶香嘅話，可以選擇配上檸檬木紅茶紅蘿蔔蓉同龍蝦醬嘅水煮鱈魚；另一個主菜選擇係手工蟹肉意大利粉配融入焙茶嘅翠玉瓜天婦羅；肉食愛好者就可以選擇搭配融合咗菊花沱茶醬汁嘅西班牙烤伊比利亞豬里脊肉，或者伴以注入御選普洱醬汁嘅香煎日本岩手A5前腰脊牛肉。最後，仲有一份注入1837黑茶嘅草莓果凍配法式杏仁蛋糕搭做甜品。
套餐會奉上兩款溫潤嘅調配茶，水晶皇后之茶味道帶莓果同忌廉甜香；而另一款係以清新綠茶、酸甜檸檬同玫瑰製作嘅冰皇后早餐茶。
母親節精選套餐
供應日期：5月11日至5月13日
價錢： 每位$428
有無熱愛歐美style嘅媽媽呢？呢款母親節餐單包含三道西式菜，先以清新水牛芝士配紅菜頭沙律、黑蒜同清爽烤帶子配青瓜凍湯做前菜，然後以香燒惹味羊扒作為主菜，最後仲有香濃朱古力撻配幼滑豆蔻雪糕做甜品。如果媽媽好酒，仲可以點翻杯捷克經典啤酒Contemporary Pilsner或者少爺麥啤新鮮限量釀製嘅經典Classic Pale Ale啤酒，同媽咪盡情chill一chill！
三道菜母親節分享套餐
供應日期： 5月12、13日
價錢：每位 HK$ 360（另收加一服務費）
文、相：Kenna
