初夏將至，最啱食返碗香辣惹味嘅麵！沙田區最近開咗間新派南洋風味麵館，有馬來辣蝦湯麵配大大隻彈牙老虎蝦，亦有咖喱喇沙、白胡椒肉骨等唔同口味。食完仲可以加多杯特飲或者食返件榴蓮甜品，選擇都幾多元化。
 

招牌馬來湯麵

馬來辣老虎蝦麵（$168）

Mimila位於沙田新城市廣場，Mi喺馬來話係麵咁解，亦係呢間新店嘅主打。食得辣嘅朋友仔必試呢碗招牌馬來辣蝦麵，亮點在於香味十足嘅蝦湯，每煲都用咗30斤新鮮海蝦，由剝殼去腸、炒香到加埋香料一齊熬煮，成個過程要用成三日！難怪飲落香、辣、鮮味俱全。
 

而配料仲可以「升呢」做馬來西亞老虎蝦！兩隻老虎蝦都有手掌咁大，口感彈牙而且蝦膏鮮甜，配埋蝦湯的確有驚喜。如果覺得仲未夠辣，可以加埋枱上面嘅自家製指天椒豉油呀。
 

咖哩喇沙牛肉麵（$98）

另一款招牌係咖哩喇沙湯底，用咖喱、黃薑、椰漿同多款香料炒製，香味濃郁口感較厚。味道以咖喱為主，辣勁比辣蝦麵低，無論係配牛肉、魚片，或者半熟蛋都一樣咁夾。
 

而麵類亦有多種選擇，包括馬來西亞人最愛嘅摻摻（米粉油麵雙拼）同福建人成日食嘅油麵。另外亦有米粉、河粉、檬粉，銀針粉（老鼠粉）同粗米粉（米線）。
 

創新蝦子撈麵

白胡椒肉骨撈麵（$98）

而如果搵一款香港人同南洋人都鍾意嘅麵，就要數到蝦子麵喇。餐廳特別搵麵廠訂造更富蝦子香味同更彈牙嘅頂級蝦子麵，嚟創作一系列撈麵。好似呢碗白胡椒肉骨撈麵，靈感嚟自肉骨茶，選用一字骨配白胡椒熬製，一夾就骨肉分離，肥瘦比例適中而且味道夠香辣。而蝦子麵撈埋蔥油同秘製醬料而非常香口。
 

自家製榴蓮甜品

貓山王卷蛋糕（$58）

甜品同樣富有南洋風味！班蘭戚風蛋糕（$58）選用新鮮馬來西亞班蘭葉，而貓山王卷蛋糕就用咗馬來西亞嘅貓山王榴蓮果肉，混入法國忌廉當中，啖啖榴蓮果香。
 

貓山王芝士蛋糕（$58）

芝士蛋糕同樣選用馬來西亞貓山王榴蓮配澳洲芝士，口感柔滑，不過榴蓮香味就不及卷蛋嚟得濃郁。下面有一層戚風蛋糕增加口感層次。
 

南洋風味飲品

美祿可可（凍）（$32）

馬來冰咖啡（$32）

飲品當然亦有唔少地道選擇，美祿可可上面有一座美祿粉堆成嘅小山，撈埋飲越飲越香濃！而馬來冰咖啡同一般咖啡唔同嘅地方在於會用原杯咖啡加煉奶，再攪拌成泡沫咖啡，咖啡嘅香同煉奶嘅甜都相當突出。
 

Mimila
沙田沙田正街18號新城市廣場1期7樓704號舖

文、相、片：Cathy