呢間新派點心店每次都有驚喜，繼之前嘅Miffy同蠟筆小新，今次就搵到海綿寶寶！招牌流沙包等當然唔少得啦。而且特別在今次所有點心都係素食，連甜品都係半糖，啱相機食先亦啱哂注重健康嘅你。
 

即日起点心代表嘅尖沙咀店同中環店會同步推出全新海綿寶寶系列。店裡面換哂海綿寶寶裝飾之餘，仲特別以型格黑、白、黃色主調示人，等點心嘅時候可以自拍陣先。
 

奶黃流沙包

奶黃流沙包一籠兩件，餡料用咗鹹蛋黃、好立克粉、煉奶同植物牛油，食到粒粒鹹蛋黃。流心程度雖然唔算非常彭拜，不過餐廳亦非常有誠意地寫明「唔流包換」。
 

紫芋流沙包

而紫芋流沙包就將餡料改為紫芋、煉奶同植物牛油等。紫色係幾搶眼嘅，不過味道就偏淡，唔夠奶黃餡惹味喇。
 

黑松露雜菌蒸包

而呢碟黑松露雜菌蒸包係比較香口嘅選擇，個名叫包但賣相有啲似腸粉，裡面包住黑松露、雞脾菇、鮮冬菇同秀珍菇，菇香誘人。
 

蜂蜜奶黃西多士

除咗中式點心之外仲有西式點心，好似呢碟蜂蜜奶黃西多士就好有中西合璧感，西多士加入流心中式奶黃餡，再配以菠蘿、蜂蜜同海綿寶寶糖霜曲奇，夠哂Sweet。
 

 

三兄弟素蝦餃

雖然今次係素食點心，但唔洗擔心選擇會少咗。好似呢籠三兄弟素蝦餃咁，就特別改用素蝦同蘆筍做餡料。
 

海綿寶寶千層馬拉糕

煎蛋素糯米雞

好友春風腸

另外仲有唔少飽肚中式點心，包括選用日本北海道3.6牛奶、日本雞蛋同奶黃嘅海綿寶寶千層馬拉糕，同加入素臘腸、素鮑魚等食材嘅煎蛋素糯米雞。
 

黑椒素豬柳漢堡

青芥素魚柳包

或者想轉下口味嘅話，另有黑椒素豬柳漢堡同青芥素魚柳包兩款西式啲嘅選擇。

海綿寶寶原味椰皇（左）、派大星紫芋椰皇（右）

鮮芒果布甸

最後當然要食埋甜品先叫完滿嘅一餐啦，海綿寶寶原味椰皇同派大星紫芋椰皇都選用日本北海道3.6牛奶，而且仲會附送海綿寶寶波板糖一支。而鮮芒果布甸同草莓啫喱亦用咗新鮮水果配北海道3.6牛奶。
 

桃味特飲

全個海綿寶寶系列總共有十款點心、四款點心、兩款飯類同五款飲品，供應至2017年12月31號咋，Fans想嚟集郵記得把握時間啦。
 

点心代表
尖沙咀彌敦道100號The ONE 3樓L308號舖
中環德己立街1-13號世紀廣場地庫

文、相、片：Cathy