最近摩登中國茶當道，繼特色茶室同手搖中國茶飲品店之後，尖沙咀最近都有一間新店以中國茶做主題，有Gelato、Mocktail、蛋糕等選擇。另外仲有素食版本漢堡，甚至係全日早餐！如果你鐘意飲中國茶或者係素食者，呢間絕對會係你杯茶。
 

2DP開喺尖沙咀厚福街，裝修走簡約白色主題令人一眼就留意到。夏日炎炎不妨先嗌返杯雪糕，鐵觀音Gelato食落有清幽茶香，回甘亦相當討喜。問過老闆先知佢地連茶園都係親自走訪過，特別挑選高海拔茶山嘅有機鐵觀音茶葉，而且烘焙度較淺容易入口。
 

另一款推介係普洱朱古力Gelato，採用百年古樹茶種嘅普洱茶葉，不過可能因為有埋一粒粒嘅朱古力喺裡面，食落朱古力甜味比較突出。全部Gelato都係採用新西蘭牛奶，無添加任何防腐劑同人造色素。仲有白兔糖同奶醬多等特色口味，嚟試多兩輪都唔怕悶。
 

中國茶除咗可以食，當然仲可以飲啦。調茶系列分三款茶底共十款選擇，鐵觀音Mojito飲落充滿薄荷同青檸嘅清涼，唔愛甜嘅男士都可以一試。水蜜桃白茶梳打就多咗一份蜜桃甜香，仲有一粒粒桃肉幾有少女Feel。想試到真正茶香亦有多款手沖同冷泡純茶。
 

餐廳另一主打係素食主菜，最受歡迎嘅素牛大啡菇漢堡分量十足！有沙律菜、蕃茄、素漢堡扒、特製醬汁、炒啡菇、炸羅勒葉等，連麵包都係搵藍帶畢業廚師特製。
 

當中最特別嘅每日新鮮手打嘅漢堡扒，用烤麩、秋葵、藜麥、豌豆、甜菜頭同蓮藕等食材，打碎後利用秋葵嘅粘性捏成扒。特製醬汁特別加入穀物，所以口感特別有顆粒感，咬口同一般漢堡感覺完全唔同。而包住羅勒葉嘅港式雲吞皮炸後非常香脆，增加口感同味道層次。
 

餐廳特別同營養師合作，所以餐牌上有唔少高纖同素食選擇。西西里雜菜蕃茄意大利粉當中蕃茄嘅微酸相當醒胃，雜菜同意粉亦無煮得過淋。老闆仲話考慮到越嚟越多素食者嚟幫襯，計劃稍後推出無忌廉同改用vegan pasta嘅全素版本！
 

完整嘅一餐當然唔少得甜品，鐵觀音青蘋果蛋糕同普洱榛子朱古力蛋糕嘅賣相都似足迷你茶壺，當然要相機食先。用嘅亦係餐廳特別搜羅返嚟嘅高山產地直送茶葉，甜度得宜。
 

睇得出餐廳對食材方面非常講究，由茶葉嘅產地、烘焙度到茶葉碎嘅粗幼度，以至素食菜式嘅配搭同營養價值。所以餐廳特別改名做2DP，即係2 Decimal Places，以數學精準至取小數點後兩個位嚟比喻餐廳嘅用心，有諗頭又有誠意，值得一試。

2DP
尖沙咀厚福街12至12號A藍馬商業大廈地下

文、相、片：Cathy