涼果唔一定係老土嘢，好似呢間本地涼果店就諗諗新意思，將涼果元素融入軟雪糕當中，創出涼果口味雪糕，唔只成功吸引到一班甜品控大排長龍幫襯，最近仲衝出原址，喺旺角鬧市開首間分店。

擺脫涼果框架！日賣過百杯栗子、話梅軟雪糕

由店名到店舖格局，你都未必發現到呢間涼果店有咩咁特別，但走到店內盡頭，會神奇地發現佢哋竟然賣埋雪糕？小店由大埔起家，開業超過10年，主打一系列新鮮即炒乾果，好似栗子、瓜子、夏威夷果仁、開心果仁、花生等等。除咗涼果，店舖嘅雪糕都好受歡迎，更一度喺雪糕關注組爆紅！一到週末，涼果店門外就會聚集一群人排隊等食雪糕。

旺角新店試業中，空間比起大埔店闊落

栗子同話梅軟雪糕係假日限定，星期一至五則供應時令軟雪糕

旺角新店嘅雪糕款式同大埔相同，有20款時令雪糕同6款特別口味，亦有杯裝雪糕供應。當中軟雪糕分別有栗子同話梅口味，前者選用當季北方栗子混合日本牛乳製成，栗子香氣突出仲好重牛乳味，質感順滑唔甜膩，非栗子迷都值得一試！後者就加咗磨成粉末狀嘅話梅同日本1%乳脂，最後再灑上話梅粉，係雙倍層次啊～

栗子軟雪糕（$38/杯），入口Creamy奶香同栗子味相互平衡

話梅軟雪糕（$38/杯）除咗雪糕基底有話梅味外，表面仲灑有話梅粉，酸甜開胃

真材實料果仁雪糕 元祖級口味+人氣開心果

涼果店同時供應3款果仁雪糕，分別有榛子、開心果同杏仁款式，比起軟雪糕，果仁雪糕質感密度較高，口感實在。講到元祖級口味，就係香脆杏仁雪糕喇～呢款以雲呢嗱雪糕球做基底，真係見到有黑色點點嘅雲呢嗱籽，證明真材實料。店員會即席盅碎杏仁，喺香氣最突出嗰時，糅合雪糕球內，每一啖都食到杏仁粒粒，好香口，即使獨食一杯都唔覺膩。

香脆杏仁（$50/杯）係店內果仁雪糕嘅始祖口味

香脆開心果更係人氣之選，一球開心果雪糕包含一小包開心果肉，分量慷慨，確保做到啖啖有濃郁開心果味，難怪咁受歡迎喇。

香脆開心果（$50/杯），客人Order完後，店員會即場盅果肉，糅合喺開心果雪糕內

想食其他口味一樣有，包括香蕉焦糖、焙茶、生薑、手工奶茶、陳皮等等，甚至連雪糕筒都可以5選1揀原味窩夫、朱古力窩夫、竹炭威化、威化同紙杯，配搭多元化。食完甜品亦可以睇吓有咩涼果啱食𠻹！

涼果店仲有多款乾果、口立濕畀大家選購

皇甘栗鮮炒乾果專門店
地址：旺角山東街53號地舖

相、片、文：Sharon
剪：Tony