又有咖啡店開喺深水埗，新店走日式簡約風格，以木同白色為主，加上係高樓底增加空間感，坐得又幾舒服。主打咖啡及輕食，更有寵物友善空間同設計畀狗狗嘅食物，可以帶埋毛孩去Chill下！
Kokoni Coffee位於深水埗基隆街，店名Kononi嚟自日文「ここに」，即係「在這裡」嘅意思。因為幾位合夥人都特別鍾意日本，亦希望喺深水埗開多一間日式風格嘅小店，所以從裝修到食物都加入日本元素。
Beef Shigureni Egg Drop（$78）
食物當中最受歡迎嘅係吐司，呢款以牛肉時雨煮為主角，用一般佃煮唔同嘅係燉煮時會加入薑絲，食落鹹鹹甜甜，當中仲有薑嘅香氣，更為清爽。而雞蛋參考咗玉子燒，蛋漿當中加入日本味啉增添甜味，口感嫩滑，厚度適中，同牛肉嘅比例啱啱好。加埋爽脆嘅蔬菜同富牛油香嘅牛油方包，味道層次非常豐富。
Matcha Green Tea Sundae（$68）
甜品選擇更多元化，呢款抹茶新地好啱抹茶控！本地品牌嘅抹茶雪糕加上日本抹茶粉、宇治抹茶、抹茶蕨餅、白玉、紅豆、藍莓同士多啤梨。當中日本空餘嘅抹茶蕨餅嘅回甘最突出，口感軟彈。抹茶雪糕就茶香同奶香平衡，清香微甜。白玉軟糯、紅豆蓉香甜、莓果微酸，各自同抹茶雪糕都好夾。
Coffee Combo（Espresso+Piccolo）（$46）
咖啡豆選用本地烘焙品牌，一般會用House Blend，亦可以加$8轉為SOE豆。想試齊Black同White兩款風味可以點Coffee Combo。開飯仔試咗House Blend，Espresso一入口就有非常強嘅酸味，之後有杏仁香，後韻帶甜。而Piccolo就係甜香為主，酸味減低，有啲似提子！
Black Latte（$45/Hot，$50/Iced）
即係黑芝麻拿鐵，選用台灣純素黑芝麻醬沖調，芝麻香濃郁而且甜度適中，飲完成杯都唔會覺得太膩，口感柔滑。
更多【新店直擊】： |
（Dog Menu）Burger（$68）
咖啡店特別設計咗三款可以畀狗狗食嘅嘢食，分別係漢堡、梳乎厘班戟同戚風蛋糕，用嘅所有都係人都可以食嘅食材（不過因為唔建議狗狗食太多調味料，所以人食嘅話就會覺得無味），各位主人可以放心畀自己嘅毛孩食呀。
Matcha Green Tea Roll（$45）
Hojicha Tea Roll（$45）
Cold Brew Coffee（$60）- 小店之後會推出罐裝冷泡咖啡同冷泡茶，數量有限
半室外座位有狗狗P位，歡迎大家帶埋毛孩嚟
Kokoni Coffee
地址：深水埗基隆街156號地舖
文、相：Cathy