雪糕口味千變萬化，你覺得邊款可以代表到香港？不妨去深水埗呢間新開嘅雪糕專門店試下佢哋嘅出品再下定論，皆因小店正以本土口味為主題，四款自家製雪糕分別取材於茶餐廳同糖水鋪，好似鹹檸七、菠蘿冰等。配搭埋唔同配料或自家製雪條，打卡之外味道都有驚喜。
 

店中係由插畫家yin.sketches繪畫嘅深水埗地圖，畫出多個地標同常見舖頭種類

「迆」雪糕專門店位於界限街南楓樓，店名「迆」就係大家成日講嘅「Hea」，因為幾位店主都鍾意食雪糕，想開一間有集體回憶，同時畀大家叉下電嘅舖頭，就揀咗喺新舊共融嘅深水埗開店。全部雪糕都係每日開舖前即場新鮮製作，以植物奶代替牛奶，素食朋友都食得，而且食完感覺無咁膩。現時有四款口味同兩種扭紋配搭，1-1.5個月會更換一次口味。
 

順住迆（大迆$38，特迆拼紅豆雪條$46）

即係豆腐口味雪糕，用嘅豆腐係以真·本地有機黃豆製作，另一特別之處係配搭自家調配嘅麻辣醬，入口先有醬嘅海鮮鹹香，麻辣後勁會突然衝上嚟，食多兩啖習慣咗個辣味後就會慢慢食到豆腐雪糕嘅豆香同甜味，會中和返個辣味，層次分明。雪糕口感綿密而且都幾滑，如果怕辣或者食素嘅朋友就可以唔要麻辣醬改配木糠。
 

夠姜迆（大迆$38，特迆拼檸檬雪條$46）

焫焫焫焫焫焫着啦！講緊呢杯本地薑味嘅雪糕，用咗辣度適中嘅子薑製作，食落真係有薑茶嘅辣勁，後段係薑嘅香氣同雪糕甜味。口感帶一粒粒薑蓉沙粒狀，食得出真材實料，而且唔會過甜或者過膩。配搭返焦糖脆脆，甜得嚟有少少焦香、增加口感同香味。
 

 

Chill 超迆（大迆$38，特迆拼話梅雪條$46）

貪心啲可以點扭紋雪糕嘅特迆，食到兩款雪糕口味再加自家製作雪條，多重口味同味道層次！

自家製話梅雪條嘅梅味非常濃郁，真係好似食咗粒話梅咁，鹹酸醒神。菠蘿冰雪糕有菠蘿嘅酸味同梳打嘅甜味，加上雪糕嘅冰涼口感，完全成功還原茶餐廳嘅經典菠蘿冰！鹹檸七同樣對版，鹹檸檬嘅鹹同酸味道自然，七喜汽水味反而無想象中咁出，整體甜度適中，加埋檸檬皮同薄荷感覺特別清涼。
 

首輪雪糕全部都係純素，不過注意返部分配料、原味同竹炭味雪糕筒就係蛋奶素，如果係食純素、或者對部分食物有敏感嘅朋友可以更換配料同轉做紙杯裝

雪糕紙筒有四款特別設計，分別係原創深水埗地圖，同三款港式集體回憶圖案

雪糕之外亦有供應甜品及飲品

「迆」雪糕專門店
地址：深水埗界限街10F號南楓樓地下5號舖

文、相：Cathy.H