又有下午茶推介喇！今次仲要係Movenpick雪糕下午茶添呀！聽到都覺得好開心~~

尖沙咀有酒店新推三層下午茶餐，6款鹹點4款甜點，另配英式鬆餅，加少少錢仲可以嘆埋雪糕蛋白脆餅添，而最吸引嘅位係，仲可以免費無限任食Movenpick雪糕呀！

逐層睇下先~ 最頂層嘅係必須盡快食咗先嘅甜品層。有迷你雪糕窩夫筒啦、迷你雪糕泡芙啦、藍莓雪糕杏仁撻同青檸紅桑子醬蛋糕卷，迷你到一啖就食得到，唔係好夠喉？預咗你啦為食鬼，可以無限任食呀……迷你雪糕窩夫筒。場內設有「雪糕車」，行出去拎就有得添食喇！不過唔好問我有咩味嘅雪糕揀，我都唔知，每日都唔同款㗎。

好，到中間嗰層。有幾fresh嘅薄荷青瓜湯辣蝦、好rich嘅鵝肝醬朱古力，同煙三文魚pancake。

至於最底嗰層，就有意大利火腿蜜瓜串、蟹肉脆多士同幾特別嘅茄醬焗蘆筍。平時食呢啲三層架通常focus都係甜點，但今次，鹹點呢兩層嘅水準都不容忽視呀。

呢個Movenpick雪糕盒裝住嘅，鬼馬喇，唔係雪糕，係英式鬆餅呀。有三款醬料可以揀嚟搽：果醬、蜂蜜同奶油忌廉。食晒成set都咪話唔飽。

加錢配嘅雪糕蛋白脆餅，同樣都係每日唔同口味，開飯仔呢日食到嘅係芒果味。上枱嗰陣，有煙霧效果㗎，然後再用槌扑開個殼嚟食，成件事都好IG-able，仲要係boomerang嗰隻！不過，真係好鍾意甜食嘅朋友先好嗌，個蛋白脆餅都幾甜下。

Green
地址：尖沙咀科學館道17號唯港薈地下
期間限定：即日 至 10月31日（下午3:00 – 5:30供應）

文、相：Kar